Обелисклар ачылды
Әтрәкле авыл җирлегенә караган Чупай һәм Филимоновка авылларында да сугышта һәлак булганнар истәлегенә обелисклар ачылды.
Чупай авылында обелиск булдыру өчен моннан ике ел элек Виталий Миңнегулов чыккан булган, халыктан акча җыя башлаганнар иде. Ниһаять акча җыелып беткәч обелиск төзү эшенә алындылар.
Обелискка төзелеш материалларын үз машинасы белән Марсель Ярмиев алып кайтты һәм авыл халкы бергәләп җыелышып обелискны бер атна дигәндә төзеп тә куйдылар. Мәрмәр ташка сугышта катнашкан 89 ветеранның исеме язып куелган. Чупай да обелискны 9 май көнне, ә Филимоновкада 7 май көнне ачтылар. Бөек Ватан сугышында һәлак булучылар истәлегенә тере чәчәкләр, веноклар салдылар. Тик бу авылларда да сугышта катнашкан ветераннарның калмавы йөрәкне телгәли, ди алар. Заманында яу сөреме кагылмаган гаилә, йорт булмаган бит. Ил иминлеге, дөнья тынычлыгы өчен көрәшкән батырларыбыз хакында онытмау, аларга карата ихтирам рухын яшәтү- һәммәбезнең мөкәддәс бурычы.