Җиңү килде җирне нурга күмеп!
Кадерле фронтовиклар һәм тыл хезмәтчәннәре! Сезне чын күңелдән Бөек Җиңүнең 70 еллык юбилее белән тәбрик итәм!
1945 елның 9 мае – гаять кадерле, изге, истәлекле көн. Бөек Җиңү ифрат зур корбаннар бәрабәренә яуланды. Ирләре һәм уллары сугыш кырларыннан әйләнеп кайтмаган аналарның, хатыннарның ачы кайгысын, геноцид, фашист итеге астында калган җирләрдә кол хәлендә гомер сөрү авырлыгын, ачлыкны, блокада газабын, бөек мәдәниятебезнең кыйммәтле җәүһәрләре юкка чыгарылу кебек вәхшилекне бәяләп, сүз белән тасвирлап бетерү мөмкин түгел.
Районыбыздан сугышка киткән 15 мең кешенең 8 меңгә якыны туган нигезләренә кире әйләнеп кайтмады. Бездә сугыш хәсрәте кагылмаган бер генә гаилә дә калмады. Зур батырлык күрсәтүләре өчен сугышта катнашучыларның һәрберсе диярлек орден- медальләр белән бүләкләнде, дүрт якташыбызга Советлар Союзы Герое исеме бирелде, ике кеше тулы Дан орденнары кавалерлары булып кайттылар. Сугыш фронтның алгы сызыгында гына түгел, тылда да барды. Көче булган һәркем халык хуҗалыгында – басуларда, заводларда эшләде, хатын-кызларыбыз оборона корылмалары төзүдә катнаштылар. Хезмәт батырлыклары өчен ветераннарыбызга олы рәхмәтебезне җиткерәбез. Хәзерге вакытта ветераннарыбызның тормыш шартларын яхшырту өчен фатирлар бирелә, федераль, республика, район күләмендә төрле программалар эшли. Хөрмәтле ветераннар! Сезгә барысы өчен дә зур рәхмәт! Барыгызга да нык сәламәтлек, җан тынычлыгы телибез, якыннарыгызның хөрмәтен тоеп, озак яшәргә язсын. Дөньялар тыныч булсын! Бөек Җиңү көне белән!
Айдар Салахов, Минзәлә муниципаль район башлыгы.