Гөлбакча да булыр әле!

“Кояш гомере телим мин, Минзәләм, сиңа!” фестивале быел Югары Тәкермән җирлегендә үтте. Кунакларны тәбрикләү сүзе белән чыкканда җирлек башлыгы Алия Шәрипова “Гөлбакча” исемле паркка нигез салыначагын хәбәр итте.

 Гөлшат Зәйнашева иҗатына багышланган шигърият һәм сәнгать җыенына килгән кунакларны гаҗәпләндереп, авылдашларын шатлан­дырып ул тагын берничә яңалык җиткерде.

Фестивальгә килгән ку­наклар – Әзһәр Хөсәенов, Рафаил Шакирьянов ел саен көй-моңнары белән минзәләлеләрне соклан­дырып китүче Искәндәр Биктаһиров, Кирам Са­тиев һәм районның баш­карма комитет җитәкчесе Илгизәр Шагалиев, рай­он башлыгы урынбасары Фәис Вагыйзов, җирлек башлыгы Алия Шәрипова, мәктәп укучылары, Ка­заннан һәм Минзәләдән килгән күпсанлы кунаклар авылга керү юлында яңа стела ачтылар. Анда Гөлшат Зәйнашеваның иң данлыклы җырларының берсеннән: “И гүзәл ту­ган ягым, и ямьле туган ягым, бәхетемне читтә түгел, мин синдә тап­тым”, дигән юллар бар. Мәдәният бүлеге началь­нигы Данир Фәхретдинов баянын сузып җибәргәч, кунаклар М-7 трассасын­нан бертуктаусыз үтүче машина хуҗаларын һәм постта торучы ЮХИДИ хезмәткәрләрен гаҗәпләндереп, ул җырны рәхәтләнеп башкарды­лар.

Ә мәдәният йортында ике сәгатьтән артык бар­ган концертта җырлар гына түгел, шигырьләр дә яңгырады.

Менә шунда район башлыгы Айдар Сала­хов тәкъдиме һәм ярдәме белән федераль максатчан программа нигезендә тор­мышка ашырылачак идея – яңа йортлардан торган бер урамга Гөлшат Зәйнашева исеме биреләчәк. Ә бе­ренче рөхсәт кәгазе күп балалы Садыйковлар гаиләсенә (рәсемдә) тапшырылды. Гөлшат Зәйнашева фестиваленең Минзәләдә – әлеге авыл­да ел саен үтәчәгенә сим­волик мәгънәгә ия бул­сын иде ул. “Гөлбакча”да Гөлшат Зәйнашеваның “Сандугач”ы туктамыйча сайрасын иде.

Әлеге җыенда җирлек башлыгы Алия Шәрипова 5 ел буе ярдәм итеп тор­ган (стела корыр өчен дә акчаны ул бирде) район Советы депутаты Ленар Гаяновка зур хөрмәтен күрсәтте – «Авылның мактаулы гражданы» ал лента һәм таныклама тап­шырды.

 безнең белешмә

Гөлшат Зәйнашева татар халкы өчен бай иҗат мирасы калдырган әдип: шагыйрә һәм драматург. Аның иҗаты, бигрәк тә җырлары, һаман да халык күңелендә яши. Минзәләдә фестиваль быел дүртенче тапкыр үткәрелә. Аның балачагы хакында “Татмедиа”ның Минзәлә филиалы хезмәткәре Рөстәм Хәкимҗанов ре­жиссер-куючы, оператор, хәтта сце­нарист буларак менә дигән фильм төшерде. Аны быел Югары Тәкермән клубына җыелган тамашачылар тел шартлата-шартлата карады.