Фәнсез алга барып булмый
Әтрәкле авылы мәдәният йортында үткән семинарда район башлыгы Айдар Салахов, ТРның атказанган авыл хуҗалыгы хезмәткәре, биология фәннәре кандидаты, “Биопрепаратлар” җитештерү институты директоры Римма Ибатуллина, “БашИнком”ның доценты, авыл хуҗалыгы фәннәре кандидаты, әйдәп баручы белгече Флорид Дәүләтшин, Актаныш ветеринария лабораториясенең азык сыйфатларын билгеләүче белгече Рөстәм Һадиев, районның хуҗалык җитәкчеләре, терлекчелек буенча бухгалтерлары, авыл җирлекләре башлыклары, мәктәп директорлары катнашты. Беренче ике чыгыш ясаучы терлекчелектә һәм игенчелектә куллана торган биотехнологияләр, азык өстәмәләре, биопрепаратлар турында сөйләп киттеләр. Рөстәм Һадиев, Актаныштагы ветеринария лабораториясендә терлек азыгына тирәнтен анализ ясыйлар, шуннан соң тиешле рацион төзергә мөмкинлек була, дип ассызыклап үтте. Район авыл хуҗалыгы һәм азык-төлек идарәсеннән алынган саннарга караганда, үрчем, тәүлеклек үсеш алуда һәр хуҗалыкның мөмкинлекләре зур булса да, хакыйкатьтә исә күрсәткечләр күпкә түбән. Бу хакта газетабызның алдагы саннарында укырсыз.