Минзәлә Кулибины
Шәһәрдәшебез Рәҗәп Шәрифҗанов уйлап чыгарган техника бер көндә 5 гектар җирне кардан чистартырга сәләтле.
Аның белән сөйләшкәндә элеккеге уйлап табучы Леонардо да Винчига охшаттым.
– Берничә төр техниканы алыштыра алган, нәтиҗәле эшләгән, аз ягулык сарыф иткән машина турында элек-электән уйланып йөрдем, – ди Рәҗәп.
Машина тормышының мәгънәсен тәшкил иткән Рәҗәп әфәндене шәһәребездә белмәгән кеше сирәктер. Ул тумышы белән Дәвек авылыннан. Әле күптән түгел генә 60 яшен тутырды, 40 елдан артык хезмәт стажы бар, армия сафларыннан кайткач, халыкка көнкүреш хезмәте күрсәтү комбинатында шофер булып байтак еллар эшли, хәзер 2 нче урта мәктәпкә Юртаудан Пежо автобусында балаларны йөртә.
– Мин кечкенәдән техника яраттым, –ди Рәҗәп әфәнде, – үсә төшкәч ихатада булган велосипедны, утюгны һәм башкасын ремонтладым. Хәзер дә буш вакытым булса, таныш
белешләрнең нинди техникасы бар, шуны рәтләп, төзәтеп бирәмен.
Башта улының җиңел автомашинасы юл һәла- кәтенә эләккәч, аны төзәтерлек булмый, шул чагында ул аның двигателен куеп икенче төрле машина ясарга уйлый һәм ул теләген тормышка ашыра. Башта уйлый, алгы мостына Жигули, арткы мостына УАЗның тәгәрмәчләрен куеп, тапшырулар тартмасына 2106некен куя, аннары үзенә ничек кирәк шулай итеп машинаны җыеп та куя. Шестерка двигателенең көче күп булганлыктан металл җыю пунктына барып Ока двигателен алып кайта, шуны куя. Шулай итеп ул бик матур гына, компактлы машина ясаган. Тормозлары тота, температураны күрсәтә, алгы һәм арткы утлары яна. Гади механизм белән чүмеч тә көйләп куйган. Быел кышкы чорда үзенең ишегалдын, урамдагы карны шул машина белән эттереп чистарткан. Җәй көне гидравлика куеп, ат сабанын көйләп бакча сөрергә дә уйлап тора.
Аның машинасы куркынычсызлык таләпләренә тулысынча җавап бирә, сәгатенә 30 километр юл уза. Ул җыйган машина белән кар эттерергә, сабан сөрергә, арба тагып урманга да барырга була. Ул бик җиңел, йомшак, юлда яхшы йөри, бөтен сынауларны яхшы узган. Киләчәктә әле бу машинага ул кабина да ясамакчы.
Дилфас ГАЛИЕВ