Медаль янына Равил Миңнехуҗин бүләкләре
Әлеге чарада район аппараты җитәкчесе Роза Салдаева да катнашты, ул изге теләкләрен җиткереп, кулларын кысып, 23 ветеранның күкрәгенә медаль такты. Ул тылда хезмәт куйган ветераннарга җиңүне якынайтуда керткән хезмәтләре өчен зур рәхмәтен җиткерде.
Ветераннар каршында мәктәп укучылары һәм үзешчән сәнгатьтә катнашучылар чыгыш ясадылар. Юбилей медаленнән тыш һәр ветеранга азык- төлек җыелмалары да тапшырылды. Иркәнәш авылы җирлегеннән район Советына депутат булып сайланган Равил Миңнехуҗин да һәр ветеранга үзенең махсус бүләген әзерләгән иде, аларны да ветераннарга бүләк иттеләр. Соңыннан ветераннар мул аш табыны артында сыйландылар.
Ягъфәр Хафизов:
– Сугышның нәрсә икәнлеген элеккеге өлкән буынның һәр кешесе белә һәм мондый сугышлар булмасын иде, әлеге бәйрәмне оештырганнары өчен ТР Президенты вазыйфаларын вакытлыча башкаручы Рөстәм Миңнехановка, район башлыгы Айдар Салаховка рәхмәт.
Саимә Шәймарданова:
– Шушы җирлектә туып көне-төне эшләдем, чәчү чәчтем, сабан сөрдем, урман кистем, эскерт өйдем, кыскасы авылда нинди эш бар, шуны эшләдек.
Фәһимә Баһаутдинова:
– Әтием, абыем сугышта катнашты, абыем сугыш кырында ятып калды, хәзерге вакытта туганнарым барысы да вафат, авылда коръән укып, абыстай булып йөрим. Хәзерге тормыштан бик канәгать, оҗмахка тиң.
Разин Салихов:
– Сугыш вакытында кечкенәдән эшләргә туры килде. Үгез җигеп Курьядан орлык ташыдым. Сугыштан соң армия сафларында хезмәт итеп, шахтада эшләдем, чирәм җирләрне үзләштерүдә катнаштым, район сельхозтехникасында Минтимер Шәймиевның шоферы булдым. Хәзер тормышлар бик әйбәт, Аллага шөкер.