Теләсәң, эш җитәрлек

Хуҗәмәт авылы ике шәһәргә дә илтүче юл өстендә урнашкан, иң төзек һәм яшәү өчен кулай торак пунктларының берсе. Биредә халыкның тормыш- көнкүрешен тагын да уңайлы, кызыклы итү өчен авыл җирлеге, депутатлар, ветераннар советы, барлык хезмәтләр тарафыннан максатчан эш алып барыла. Бу яктан хуҗәмәтлеләр үзләрен бәхетле саный.

Хуҗәмәт авыл җирлеге башлыгы Гөлназ Вильданова белән әңгәмә барышында ул җирлектәге һәр тармакны як­тыртты:

– Узган елда Хуҗәмәт авыл җирлеге 1 млн сум грант алды. Бу акчаларның бер өлеше су башнясын куюга тотылды, аны эшләтеп җибәрәсе бар, био­термик чокыр булдырылды, зират коймасының бер өлеше яңартылды. Калган 80 мең сумнан артык акчаны үзара са­лым өчен саклап калып, аның янына дәүләттән 350 мең сум акча көтәбез. Шушы акчаларга койма тотылып бетәр дип уй­лыйбыз. Гомумән, үзара салым – яхшы программа, акчаларны кая сарыф итәсен үзебез хәл итәбез.

ТСЖ ны күп еллар Рәсимә Аз­гамова җитәкли, эшен җайлы, тәртипле алып бара. Мирная урамындагы күпфатирлы бер йортта 1 млн 800 мең сум­лык ремонт ясалган, быел суүткәргеч торбалар, канализа ция ремонтланачак. Коммуналь хезмәтләр өчен бурычлылар да юк икән.

– Бездә тормыш күпкә ал­гарышлы (цивилизованный), без терлек асрау өстенә, са­табыз, пешерәбез. Җирлек Чаллыга якын, М-7 трассасы да янәшәдә (бәлки бу бер үк вакытта проблема да тудыра­дыр). Әмма тырышкан кешегә эш җитәрлек.

Дөрестән дә, никадәр кеше эшле булган. ШЭ “Садыков” даруханәсе эшли, ШЭ “Сат­таров” кулинария цехы ачып, алты эш урыны булдырылган. Аларның продукциясенә со­рау зур, күрше-тирә авыллар­дан да килеп алалар. Шулай ук чәчтараш, тегү цехы ачылган.

“Сираев” КФХ 25 баш мөгезле эре терлек тота. Ул дәүләт ярдәменнән башка 250 метр ташлы-комлы юл җәйдергән, бүгенге көндә карда төзиләр икән, болардан тыш мөгезле эре терлек тиресен дә җыялар. Фоат Искәндәров гаиләсе белән фермада эшли, 25 баш үгез ка­рый, Рамил Муллахмәтовның 36 савым сыеры, 25 үгезе бар. Ул көненә 150 литр сөт сата. Усайда Мирзахмәт Галиев тер­лек асрый, 20 гектар җире, те­плицасы бар. Саный китсәң, алар шактый, телгә алмаган нар гафу итсеннәр. Кемне генә алма, ниндидер эш башкара, тырыша. Ял итәргә вакытлары калмаса да, берсе дә үкенми.

– Усайга ФАП төзегәндә ще­бенка җәелде, әмма авылның башка урамнарында грунт юл­лар шул килеш калды. Бакчара­сай, Иске Александровка авыл­ларында да шул ук хәл. Урам­нарны яктыртуны үзара салым программасы буенча хәл итү мөмкин булыр бәлки. Һәркем үз вазифасын намус белән үтәсә, без яхшы яшәячәкбез, алга барачакбыз, – дип сүзен йом­гаклады Гөлназ Габделәхәтовна.

“Сөт иле-Чул­ман” агрофирма- сының “Куйбышево” бүлекчәсе җитәкчесе Рамил Гәрәев та ирешелгән уңышларны, баш­карган эшләрне санап китте:

– “Куйбышево” бүлекчә- сендә 58 кеше эшли. 280 гек­тарда күпъеллык үләннәрне яңарттык. Ашлыкның ту­лаем җыемы – 20970 ц. Терлекчелеккә килгәндә, 1280 баш мал бар. 100 баш сыер­га исәпләгәндә, 94 баш бозау алынды.

100 башка иң кимендә 30 процент тана кертү зарурлы­гы, шулай ук чәчү әйләнешен яңадан карау кирәклеге искәртелде. Фермага бюджетта эшләүчеләрнең ярдәме кирәк, алар шимбә өмәләренә чыгып, мөмкин кадәр ярдәм итәчәкләр.

Бөек Җиңүнең 70 еллы­гына әзерлек бара. Җәмәк, Бикбау, Иркәнәш, Кадрәк авыллары үз скверларын, обелискларын яңарттылар, төзекләндерделәр. Бу иганә- челәр акчасына, инициати­валы кешеләр ярдәме белән эшләнде. Шулар үрнәгендә биредә дә эш башкарыр­га кирәклеге ассызыкланды. РМЗ, эшмәкәрләр, иганәчеләр ярдәме белән башкарып чы­гарга дигән тәкъдим керде. Привольега юл кирәк, бәлки ТР Авыл хуҗалыгы һәм азык-төлек министрлыгы аша программага кертеп булыр?

Сорауларның берсен күп еллар дәвамында балаларны спортка җәлеп итүдә зур өлеш керткән Флүр Галиевның тор­мыш иптәше Халисә Галиева бирде:

– Иптәшем балаларны көрәшкә өйрәтә. Аларны ярыш­ларга йөртү өчен техника юк, кайчак ата-ана үзе дә илтә. Бәлки мәктәп автобусы биреп буладыр?

Шушы җирлектә яшәүче Хуҗиәхмәт ага корыган агач­ларны кисү, чүп җыюны оеш­тыру проблемаларын күтәрде. “Чиста шәһәр” җитәкчесе Алексей Вышенскийга график нигезендә чүп чыгаруны оеш­тырырга тәкъдим ителде. Сүз уңаенда, Әтрәкле, Тәкермән, Коноваловка, Юртау авыллары да шулай оештырырга телиләр. Коноваловка, Юртау авылла­рында чүпне контейнерларга җыялар инде. Билгеле, моның өчен түлисе була.

– Бу безнең җиребез, үзебез эшләргә тиеш, дип кабул итсәк, һәрбер башлангычны яклап чыксак, яхшы яшәрбез, – ди авыл халкы.