Теләге ихлас, сөте тәмле

 Хуҗәмәт авылы малтабары Рамилне районда һәм Минзәлә шәһәрендә бик яхшы беләләр. Ул менә өч ел инде үзе җитештергән сөтне шәһәребезнең сигез ноктасында сату белән шөгыльләнә.

Приволье авылы янын­да ул үзенең җитештерү базасын булдырган. Рамил Муллахмәтов тәвәккәлләп район­да сөт терлекчелеге белән шөгыльләнергә алынган һәм уңышлы шөгыльләнүче кыю ка­рашлы фермерларның берсе. Зур тормыш тәҗрибәсе һәм аграр белемгә ия булуы, аңа өч елда эшчәнлеген киң җәелдерергә мөмкинлек биргән.

– Дәвек авылын­да тудым, миңа бер яшь тулгач, әти-әни Хуҗәмәт авылына күчеп киләләр. Әтием мәктәп директоры, әнием ин­тернатта тәрбияче бу­лып эшләде, мәктәпне яхшы билгеләргә генә тәмамладым. Алабуга педагогия институтын­да өч ел укыгач (ул чак­та укытучы һөнәренең абруе төшкәч), 90 еллар­да илдә үзгәртеп корулар башлангач, укуны таш­лап, Чаллы шәһәренең

 “Гараж-1000” оешмасын­да ГАЗ-53 автомашина­сында өч ел эшләдем. Аннары авылга кайтып, тагы ГАЗ-53 автомаши­насында хезмәт куй­дым, – дип сөйли авыл эшкуары. Ә йе, а ның к ол­хозда ындыр табагын­да эшләгәнен үзем дә хәтерлим.

Ул чактагы колхоз рәисе Әхәт абый Вильданов аны мактап телгә алган иде:

– Безнең алдынгы һәм булды­клы шоферларыбызның берсе, нинди генә эш кушсаң да ул аны менә дигән итеп башкарып чыга, – дигәне әле дә исемдә. Шулай колхозда ун ел эшләгәннән соң, үзенә ГАЗ-53 автомашинасы сатып ала, авыл кешеләренә төрле йөкләр ташый. – Рай­он авыл хуҗалыгы һәм азык- төлек идарәсе белгечләре миңа гаилә фермасы оештырып җибәрергә тәкъдим ясадылар – тәвәккәлләргә булдым. При­волье авылы янындагы чүп- чарга баткан җирдән авыл халкы кара балчыгын ташып бетергән урынны барып карадым да, шул җирне тәртипкә китерергә бул­дым, – ди Рамил.

Планировка ясап, чүпләрен башка җиргә күмдергән, 30 “Ка­мАЗ” автомашинасы кызыл бал­чык ташыган, аннары Чаллыдан шул җирне тигезләү өчен Т-170 тракторын 80 мең сумга ялла­ган. Бер миллион сум кредит алып, буе 64, киңлеге 11 метрлы сарай төзегән. Бер ел буе фер­маны торгызган. Ферма яны­на эшчеләргә шартлар тудыру өчен мунча да салып куйган. Гаилә фермасы төзегән өчен ТР хөкүмәте өлешләп бер мил­лион сумны түләгән. Субсидия озаграк килгәч, Рамил тагы бер миллион сум кредит алып, төрле җирдән, ветеринария табибы Сәлим Мөхәммәдиев белән киңәшеп, 24 баш сыер алган һәм эшли башлаган. Шул ук вакытта Хуҗәмәт ремонт-механика заво­ды директоры Хәнәфи Кәримов та булышлык күрсәткән. Печән хәзерләү өчен техника биргән. Ферма тирәсенә барлыгы 400 төп алмагач, миләш, юкә, каен агачлары утырткан.

– Быел мөгезле эре терлекләрнең баш санын 60 башка җиткердек. Көз көне булган үгезләрне суеп сатып җибәрергә туры килде. Әмма сыерларның баш санын киметмәдем, хәзер алар 36 башка җиттеләр. Бүгенге көндә гаилә фермасында мал­ларны Радик Гәрәев, Рөстәм Корбанов (рәсемдә) карыйлар.

Фермада идеал чисталык хөкем сөрә, чисталык дигәннән, аларны Рамилнең тормыш иптәше Резеда контрольдә тота, чөнки базар шартларын­да сыйфатлы продукциягә генә ихтыяҗ бар.

Соңгы вакытта продукциягә сатып алу бәяләренең күтәрелүе авыл эшкуарлары файдасына. Рамил сөтне җитештереп, үзе Минзәлә шәһәре кешеләренә сата һәм аны гел көтеп алалар.

Булдыклы авыл эшкуарыныңфермасы – үзенең милке. Ул яктан аның күңеле тыныч. Тик менә җир мәсьәләсе, авыл яныннан фермага килү юлы аны бераз борчый. Аның пай җиренә кагылышлы мәсьәлә дә тулы­сынча хәл ителмәгән. Әлеге дә баягы “Вамин” белән бәйле булганга бу шулай. Ә көтүлек җире буенча җирлек башлыгы Гөлназ Вилданова, “Сөт иле- Чулман” филиалы җитәкчесе Линар Ахунов кризис заманын­да авыл хуҗалыгын күтәрүгә алынган фермерга ярдәм итәчәкләренә шик юк. Минем карашка, җир мөнәсәбәтләрен көйләүдә авыл җирлеге, му­ниципаль власть та, закон чы­гаручылар да катгый эш алып барырга, тәү чиратта алар гади халыкның мәнфәгатьләрен күз уңыннан ычкындырмаска тиеш. Әле күптән түгел генә булган авыл җыенында район башлы­гы Айдар Салахов Хуҗәмәт авы­лыннан фермага чаклы юл сал­дыртырга кирәклеген дә әйтеп узган, Рамилнең бу мәсьәләнең чишеләчәгенә шиге калмаган. Ул инде үзе дә юл салу өчен бетон торбалар кайтарткан, хөкүмәт фермага чаклы юл са­лып бирсә эшмәкәргә бу зур гына ярдәм булыр иде. Шулай булмый мөмкин дә түгел, сөтне Минзәләгә алып бару өчен көзге һәм язгы пычракларда бикавыр. Аның автомашинасы тау­дан менә алмый. Шулай ук кыш көне бу юлны кар баса. Ручей елгасында язгы ташу да көчле була, буаны да алып китә икән, юл ябыла. Тыйнак һәм аз сүзле Рамил Рәиф улы мактанырга яратмый:

– Кайсы гына эшне алма, күп нәрсә тырышлыкка һәм үз эшеңне яратып башкаруыңа бәйле. Мин үзем, кайда гынаэшләсәм дә, йөкләтелгән бу­рычларны ихлас башкарырга тырыштым.

Чынлап та, Хуҗәмәт авы­лында кемнән генә сорама, Рамилнең булдыклы, гадел, ке­шелекле булуын билгели.

Ә эшең уңышлы барсын өчен, тылың ышанычлы булыр­га тиеш. Рамил бу яктан уңган, җәмәгате Резеда аны һәрвакыт ярты сүздән аңлап тора, кулын­нан килгәнчә ярдәм итәргә ом­тыла. Ул декрет ялына киткәнче, авылда фельдшер-акушер бу­лып эшләгән. Резеда Рамил алып килгән сөтне халыкка сата. Муллахметовларның балалары да тәртипле һәм максатка омты­лучан. Олы улы Айнур Минзәлә авыл хуҗалыгы техникумының ветеринария бүлегендә, ур­танчы улы Айрат Хуҗәмәт урта мәктәбендә, кече кызы Рияна өч яшьтә, балалар бакчасына йөри. Җәй көннәрендә кани­кулда Айнур һәм Айрат ферма малларын көтәләр.

Рамил саткан сөт турында берничә кешенең фикерләрен дә газета укучыларга җиткерәбез.

Галина Федотова:

– Мин үзем Атлар мәйданында торам, безгә Рамил сөтне подъезд төбенә чаклы ук ки­тереп бирә. Ул саткан сөт бик тәмле, куелыгы да югары, кыш көннәрендә сөт кайсыбер кешеләргә җитми дә кала.

Анна Кочегарова:

– Мин өч ел буе сатып аламын, аның сөте куе һәм кибетнекенә караганда очсызрак. Бүгенге көндә кибеттә майлылыгы 3,2 процент булган 930 граммлы сөт 55 сум торса, шул хакка Рамилдән майлылыгы 4 про­центан да ким булмаган 1,5 литр сөт сатып аласың.

Рәсим Акчурин:

– Фермерның сөте бигрәк тә тәмле, килгән саен өч литрдан ким алган юк, тормыш иптәшем сөтне кайнатып куя, аннан катык оета. Рамил саткан сөттән бот­ка пешерсәң дә, бик тәмле була. Майлылыгы һәм чисталыгы ягыннан кибет сөтенә караганда күпкә өстен.

сан

Бүгенге көндә Рамилнең гаилә фер­масында 16 баш сыер бозаулаган, ул алар­дан көн саен 245 кило­грамм сөт савып ала, 144 килосын бозаула­рына эчертә.

акцент

Быел “Татавтодор”ның Минзәлә филиалы җитәкчесе Марат Сәмигуллин авыл җыенында елга аша торба салып, юл салырга вәгъдә бирде. Шул торба булмаганга 2013 елда ук планлаштырыл­ган юл фермага салынмый калган. Авыл хуҗалыгы һәм азык-төлек идарәсе бу пробле­маны хәл итәр дип ышанабыз. Ферма салырга «кодалагач», үз бурычларыңны да үтәргә өйрәнергә иде.

Дилфас ГАЛИЕВ