Бүлек эшчәнлеге канәгатьләнерлек

Гадәттә, Яңа елга аяк басканда һәр кеше, һәр оешма узган елга нәтиҗәләр чыгара, агымдагы елга бурычлар билгеләп, шуңа ирешү юлларын эзли. РФ Эчке эшләр министрлыгының Минзәлә бүлеге узган елда нинди нәтиҗәләргә ирешкән, эффектлы эшләүне арттыру өчен агымдагы елга куйган максатлары турында мәгълүмат алу өчен РФ Эчке эшләр министрлыгының Минзәлә бүлеге начальнигы, полиция подполковнигы Илсур Хаҗиев белән әңгәмә кордык.– Илсур Миңнехәммәтович, башка еллар белән чагыш­тырганда үткән ел теркәлгән җинаятьләр буенча ниләр әйтә аласыз?

– Башка еллар белән чагыш­тырганда теркәлгән җинаятьләр буенча бераз үсеш бар. Әйтик, 2014 елда 268 җинаять теркәлгән булса, аннан алдагы елда бу сан 263 булган. Бигрәк тә белә торып кеше сәламәтлегенә зыян салу, белә торып зыян салу өстенә кеше үтерү, фатирдан әйбер урлау, талау, кеше талау, янап акча алу кебек җинаять кылу­лар арткан. Кеше үтерү, көчләү, склад, кибетләрдән, дача йорт­ларыннан әйбер урлау, автомо­тотранспорт чараларын урлау, техника хуҗаларын талау, ту­рыдан-туры һөҗүм итеп транс­порт чараларын тартып алу очраклары кимегән. Авыр һәм аеруча авыр җинаятьләр соста­вына 43 җинаять теркәлгән, ал­дагы ел белән чагыштырганда 6 җинаятькә күбрәк. Администра­тив җинаять кылулар буенча җәмәгать урыннарында спирт­лы эчемлекләр куллану, тәртип бозу очраклары кимегән. Шулай да вак хулиганлык кылу, кул­ланучылар базарында тәртип бозуларны бетерү буенча эшне яхшыртасы бар әле. “Кайнар эздән” җинаятьләрне ачыклау буенча да эффектлы эшлисе бар.

– Икътисадый өлкәдә хо­кук бозулар ни рәвешле ачыклана?

– Бу өлкәдә узган ел барысы 16 җинаять теркәлгән, алдагы ел белән чагыштырганда 33 про­центка кимрәк. Шуны искәртеп үтәсе килә: илдәге икътиса­дый хәлнең тотрыксыз булуына бәйле рәвештә мондый төр хо­кук бозулар да артыр дип фа­разлана. Шуңа күрә икътисадый һәм коррупцион юнәлештәге җинаятьләр белән көрәшүдә дәүләт тә, җәмәгатьчелек тә, гади гражданнар да комплекслы якын килергә тиеш.

– Наркотикларга бәйле җинаятьләр дә кылынамы?

– Наркотикларның законсыз әйләнеше өлкәсендә 6 җинаять теркәлгән. Шуның 66,7 процен­ты ачыкланган, бу алдагы ел белән чагыштырганда 8 про­центка кимрәк. Наркотик кул­ланган килеш кылынган ике җинаять ачылган.

– Районда терроризм, экстремизм кебек күренеш- ләргә каршы торучанлык ни рәвешле тормышка ашыры­ла?

– Бүгенге көндә традицион булмаган ислам яклы булган 9 кеше оператив учетта тора, шуның берсе Үзбәкстан граж­данины. Базарда сату иткән Әсһәдулланы һәркем беләдер. РФ законы нигезендә әлеге зат­ны Россиядән читкә чыгарып җибәрү буенча чаралар күрелде. Бездәге мәгълүматларга ка­раганда, учетта торучы бер гражданин гаиләсе белән Сириягә киткән, анда ул хәрби формированиедә катнаша. Әлеге затка карата җинаять эше кузгатылды. Исәптә тору­чы башка гражданнар турын­да тискәре мәгълүматлар юк. Аларның икесе эшмәкәрлек белән шөгыльләнә, башкалар гадәти тормыш алып бара.

– Минзәләдәге оеш­кан җинаятьчел төркем әгъзаларын ачыклауда хо­кук саклау органнары шак­тый эш башкарды. Шул ту­рыда да әйтеп узсагыз иде.

– Әйе, узган елның сен­тябрь аенда Эчке эшләр министрлыгының Минзәлә рай­оны бүлеге һәм БОП МВДның ТР буенча подразделениесе хезмәткәрләре белән берлектә “Колхозники” җинаятьчел төркеменең лидеры тоткарлан­ды, аңа карата җинаять эше куз­гатылды, өстәмә рәвештә тагын әлеге зат белән бәйле булган 4 эпизод ачыкланды. Бүгенге көндә тикшерү эшләре алып барыла. Ачылган җинаять эше кысаларында әлеге төркемнең тагын өч әгъзасы кулга алынды.

– Хокук саклау органна­ры хезмәткәрләреннән ха­лыкка иң якын торганы, халык белән турыдан-ту­ры эшләүчеләр булып полициянең участок упол­номоченныйлары тора. Аларның эшчәнлегенә дә тукталып китик.

– Полициянең участок упол­номоченныйлары бүлеге тара­фыннан 67 җинаять ачыклан­ды. 2012 елда чыккан приказ нигезендә, участковыйлар өчен куелган төп бурычларның берсе – үзләренә беркетелгән участокларда яшәүче ха­лык белән, аларның яшәеше белән танышып чыгу. Узган ел нәтиҗәләре буенча сүз йөртсәк, участок уполномоченныйлары­на бу юнәлештә эш дәрәҗәсен арттырасы бар әле. Бүгенге көндә авыл җирлекләрендәге урлау факты буенча теркәлгән җинаятьләрне ачыклау пробле­малы мәсьәлә булып торуын дәвам итә.

– Яшүсмерләр белән эш ни дәрәҗәдә оештырылган?

– Балигъ булмаганнар та­рафыннан җинаять кылулар булып тора. Алдагы елларда алар тарафыннан кылынган 5 җинаять ачыкланган бул­са, узган ел әлеге сан 6 бул­ган. Шулай ук әлеге балалар­га, гаиләгә карата кылынган җинаятьләр саны да 11 дән 19 га хәтле арткан. Җинаять кылу­га яшүсмерне тарту буенча бер факт теркәлгән. ПДН да – 37 ба­лигъ булмаган бала һәм имин булмаган 36 гаилә исәптә тора.

– Юл хәрәкәте иминле­ге дәүләт инспекциясе бүлеге узган елны нин­ди эш нәтиҗәләре белән тәмамлады?

– Әлеге службаның эффектлы эшләвен билгеләп үтәсе килә. Алар эш вакытын рациональ файдаланып, җинаятьләрне ачуда саллы өлеш кертәләр. ЮХИДИ хезмәткәрләре ярдәме белән 17 җинаять ачылды. Бул­ган аварияләргә ай саен ана­лиз ясала, авариягә китергән сәбәпләр ачыкланып, аларны бетерү чаралары күрелә. Узган ел нәтиҗәләреннән күренгәнчә, аянычлы аварияләргә ките- рүнең төп сәбәбе – машина йөртүчеләрнең таләп ител- гән тизлекне үтәмәүләре. Аварияләрнең 58 проценты тизлек арттыру, 32 проценты юл чатларында тиешле кагыйдәне үтәмәү аркасында килеп чык­кан.

сан

Узган ел юл-транспорт ва­кыйгасында 12 кеше вафат булган, 64 е – яраланган, ә 2013 елда 19 кеше үлгән, 76сы төрле дәрәҗәдәге тән яралары алган булган.