Ашпала халкы онытылмый
Кышын буранлы көннәрдә Коноваловкадан Ашпалага юл йөрмәслек хәлгә әйләнә. Авыллар арасындагы юлларны “Чиста шәһәр” предприятиесе карап торырга тиеш. Тырышып эшләсәләр дә, махсус график булса да алар өлгерә алмый. Менә шул вакытта Коноваловка җирлеге башлыгы Сәрия Билалованың тырышлыгы белән Ашпала халкына ярдәмгә “Сөт иле Чулман” агрофирмасы (җитәкчесе Линар Ахунов) ярдәмгә килә. Әлеге агрофирманың тракторчысы Мирзанур Садыйков (рәсемдә) юлны тиз арада менә дигән итеп ачып бирә.
Аның ничек эшләвен безнең menzela.ru сайтында ON-Line ТВ-Информ-Мензеля бүлегендә карый аласыз.
Мондый проблема башкаларда да бар. Шуңа күрә Яңа Маҗын авылында җирлек башлыгы Геннадий Кишев әйткән тәкъдим бик тә урынлы. Аның фикере түбәндәгедән тора: “Авыллардагы кар эттерү җайланмасы булган трактор хуҗаларын кыш көннәрендә “Чиста шәһәр” штатына куярга. Авыл кешесе эшле булачак, ә юллар чиста торачак.” Алексей Вышенский әлеге рациональ тәкъдимгә колак салыр дип ышанабыз.