Үзеңә кирәген тап

Эшсез калганнарга мәшгульлек үзәге ни рәвешле ярдәм итә ала? Бу үзәкнең ишеген кагудан файда бармы?

Бар икән шул. Без курсларны тәмамлаган бер төркем пенси­онерларга, яшьрәк хатын-кыз­ларга таныклыклар, дипломнар тапшыру тантанасында булдык.

Мәшгульлек үзәге директоры Татьяна Сәмигуллина мөһим документ алырга килүчеләрне котлап ясаган чыгышында мон­дый фикерләр җиткерде:

– Узган ел курслар беренче тапкыр Минзәләнең үзендә, шәһәрнең 2 нче урта мәктәп ба­засында узды. Программа буен­ча укырга теләк белдерүчеләр елдан-ел арта. Узган ел үзәк аша 56 кешене укыттык (600 мең сумга якын акча сарыф ителде). Яшьләрне бигрәк тә чәчтараш, бухгалтер, кадрлар белгече, компьютер дизайны, ЭВМ операторы, аш-су оста­сы, сәркатип һөнәрләре җәлеп итә. 18 хатын-кызны бухгалтер, чәчтараш белгечлекләренә укыта алдык. Курслар дүрт ай­лык программа буенча төзелде.

Программа нигезендә машина йөртү таныклыгы (Е категория­се) алырга теләк белдерүчеләр дә шактый. Бушлай булгач, бу мөмкинлектән файдаланып каласылары килә. Тик шунысы бар: ул таныклык аңа хезмәт урыны буенча кирәк булырга тиеш, ә шәхси мәнфәгатьләр өчен түгел. Укып, белгечлек алып, җәмәгать транспортында эшләргә телисең икән, рәхим ит. Курс тәмамлау турында бирелгән таныклык, дипломнар яраксызга чыгып, өстәл тартма­сында тузан җыеп ятарга тиеш түгел. Инде берничә ел “Интер­нет-долголетие” программасы буенча компьютер грамота­лылыгы нигезләренә өйрәтү программасы эшли. Пенсия яшендәге 15 кешегә таныклык тапшырылды.

Район үзәк хастаханәсе поликлиникасының өлкән шәфкать туташы Раи­са Курчаеваның шатлыгы йөзенә чыккан:

– Илнар Рафкатович (2 нче урта мәктәпнең информатика укытучысы. Ред.) безне гади күнегүләрдән башлап, интер­нет-аралашуга кадәр өйрәтте. Белемнәрне эш урынында кул­ланам, отчетлар ясыйм. Курс­лардан барыбыз да канәгать калдык.

Бала белән өч яшькә кадәр декрет ялында утыручылар­ны һөнәргә өйрәтү, аларның квалификациясен үстерү ту­рындагысы байтак ханымнар­да кызыксыну уяткан. Алай гына да түгел, курсларда укып, яңа эш урыны тапкан хатын- кызлар да күп. Моның өчен кочак-кочак документлар да сорамыйлар. Гаризадан тыш, хезмәт таныклыгы, бала белән өч яшькә кадәр декрет ялын­да утыру турында белешмә, баланың туу турында таныклы­гы күчермәләре кирәк.

Декрет ялында утыручы Венера Галиевага да шундый бәхет елмая:

– Кулыма белгечлек буен­ча диплом алуыма бик шат. “Әниемә дә прическа ясыйм хәзер”, – дип елмая үзе. Алсу Халикова исә төр- кемнең старостасы булган:

– Башта теория өйрәндек, аннары белемнәрне прак­тикада кулланып карадык: картлар һәм инвалидлар йортындә яшәүчеләргә, кор­рекция интернат-мәктәбендә тәрбияләнүчеләргә бушлай хезмәт күрсәттек. Матур, пөхтә итеп чәч кисә, ясый белсәң, гаиләнең күпме акчасы янга калачак. Һөнәрләре күп бул­ган кеше тормыш сынаулары алдында беркайчан да югалып калмый.

– Теләк зур, дизайнер, мас­сажист әзерләү курсында уку артык булмас иде, – диделәр тәвәккәл хатын-кызлар.

“Шанс” һәм “Профессио­нал” укыту-производство үзәкләре учредителе Земфи­ра Мотыйгуллина болай диде:

– Пешекчеләр алты ай эшләгәннән соң квалификация- ләрен күтәрә, ягъни 4 нче раз­ряд ала алалар. Чәчтарашлар да безгә килеп җиһазланган кабинетларда осталыкла­рын арттыра алалар. Бездә 50 гә якын белгечлек буенча уку мөмкинлеге бар. Яшьләр арасында косметолог, мани­кюр ясау остасы, визажист, ландшафт дизайнеры курсла­рында укыр идем, диючеләр дә күп. Моңа аптырыйсы да түгел: көндәлек тормышта ул һөнәрләргә дә ихтыяҗ арта. Реклама агентларына сорау зур. Шундый заманда яшибез, оешма товар җитештерүдән тыш, аны сата да белергә тиеш. Киләчәктә экскурсоводларга да кытлык булачак. Күп телләр беләсең, үз төбәгеңнең тари­хын яхшы өйрәнгәнсең, кеше белән аралашырга яратасың икән, үзеңне экскурсияләр үткәрүче буларак әзерлә. Курс­ларда шуңа да укыталар.

акцент

Бала үстерүче әни кеше әлеге курсларда белем алган өчен бер тиен дә акча түләми. Элегрәк төбәкләр өчен дә чыгым­нарны федераль бюджет каплаган һәм курсларда 3,5 меңнән артык кеше укый алган. Тик соңгы елларда үзәктән финан­слау тукталган, шуңа карамастан, республика җитәкчеләре әлеге проектның мөһимлеген аңлаганга, аннан баш тартырга җыенмый. Ә курсларда укырга теләүчеләр арта, шуңа күрә проект быел да дәвам итәчәк.

Әлфинә ВОРОБЬЕВА