Яңартылган фермага бүләк
Үткән атнада Наратлыкичү авылында реконструкциядән соң сафка бастырылган тораклар белән танышу булды.
Алар барысы да район көче белән күмәкләшеп ремонтланды. Төзүчеләр генә түгел, районның “Чиста шәһәр” идарәче компания хезмәткәрләре, энергетиклар зур көч куйды. Сүз дә юк, төп кул көче авыл хезмәтчәннәре булды. Чөнки, район башлыгы Айдар Салахов һәр очрашуда искәрткәнчә, җитештерү булганда гына авыл яшәячәк. Шул сүзләрне раслап, фермаларны тергезү буенча зур сәясәтне башлап җибәргәне өчен “Мензелинские зори”ның Калинин хуҗалыгында Наратлыкичү бүлекчәсен җитәкләгән Наил Вәлиев һәркемгә олы рәхмәтен җиткерде. Фермалар белән танышырга килгән Татарстан авыл хуҗалыгы һәм азык-төлек министры урынбасары Нәҗип Хаҗипов хуҗалыкларга “Сөт таксие“на сертификат бүләк итте (фотода). Бу агрегат яшь бозауларга тиешле температурадагы сөт эчерү өчен бик кирәк.