Равил ферма төзеде гаҗәпләндерергә илне, безне

Россия авыл хуҗалыгы министры Николай Фёдоров Татарстанга килгәч, “Миңнехуҗина М.Н.” крестьян-фермер хуҗалыгының гаилә терлекчелек фермасы эшчәнлеге белән танышып чыкты. Ул Тукай районы Бакчасарай авылында урнашкан.

Фермага 2012 елның февралендә нигез салына. Аның төп эшчәнлеге – терлекчелек продукциясе эшләп чыгару. Әлеге хуҗалыкта мөгезле эре терлек, сарыклар, атлар, кош-корт үрчетү белән шөгыльләнәләр. Бүгенге көндә фермада 8 кеше хезмәт куя, уртача хезмәт хакы – 17,1 мең сум.

Гаилә фермасы 399 га мәйданны били (җир хосусый­лыкта һәм арендада). 1 нче июньгә мөгезле эре терлек саны 134 башны тәшкил итә, шул исәптән 36 – сыер. 68 – ат, 468 – бәрәннәре белән курдю­клы сарыклар. Савым сыерла­рын 100 башка хәтле җиткерү планлаштырыла. Терлек тора­кларына киң, пыяладай тигез асфальт юлдан барасың. Сы­ерлар торагы ап-ак кыйммәтле төзелеш материалы белән тышланган.

Саву, суыту, сөтне чистарту процессы тулысынча автомат­лаштырылган. Көтүне яңарту буенча технолог кабинеты яңа заманча җиһазлар, препарат­лар белән җиһазландырылган. Сыер савучыларның ял бүлмәсе офистан бер дә ким түгел: яңа телевизор, ашарга әзерләү, җылыту мөмкинлеге бар. Ике сыер савучы ветери­нар да, зоотехник та, ясалма орлыкландыручы да. Ә ике терлек караучы бинаны чистар­ту, биредәге барлык маллар­га терлек азыгы тарату белән шөгыльләнә. Хуҗалык көнгә 550-600 кг югары сыйфатлы, майлылыгы 4.1 процентлы про­дукция сата, хуҗа әйткәнчә, сөт заводы аларның продукциясен аерым савытка бушата.

Монда шулай ук көтүне яңарту буенча ныклап уйланалар. Бе­ренче эш итеп, голштинофриз токымлы үгез алып кайтканнар. Фермер зур горурлык белән авырлыгы бер тоннадан арт­кан дистәдән артык әзмәвер үгезләрне күрсәтте.

Совет заманында ук бетон конструкцияләрдән җыелган сыерлар сараен Равил Лот­фуллович үзе “аякка басты­ра”: түбәне калайдан ябалар, стеналарын сайдинг белән җылыталар. Утарда – курдюклы сарыклар. Сарыкларның баш санын арттырырга уйлыйлар, чөнки бу бик табышлы. Фермер­га менеджмент белеменең дә кирәге чыгып куя. Куйбышев ти­мер юллар предприятиесендә эшләгәндә үк Равил Мәскәү фи­нанс-икътисад институтының менеджмент факультетын тәмамлый.

Атлар Равил Миңнехуҗинның аерым горурлыгы. “Авыр йөк ташучы Владимир токым­лы атлар тотабыз. Киләчәктә ат итеннән колбаса ясарга исәпләп торабыз. Шәхсән миңа Түбән Новгород өлкәсендәге сергач татарларының каклан­ган ат ите ошый” – ди, елма­еп. Эшмәкәрнең хуҗалыгында тагын якынча 50ләп йорт куяны бар, монда токым­лы этләр үрчетү белән дә шөгыльләнәләр.