Россиянең Татарстан Республикасы буенча 9 нчы номерлы районара салым инспекциясе хәбәр итә.
Патент системасы (ПСН) саклана, шул исәптән ваклап сату һәм йөк ташу өлкәләрендә дә, ләкин 2026 елдан башлап аны куллану шартлары үзгәрә. Аңа бары тик 2025 елда барлык салым режимнары буенча гомуми керемнәре — акчалата һәм акчасыз — 20 млн сумнан артмаган шәхси эшмәкәрләр генә күчә алачак. Патентта эшләүчеләр өчен 2025 елда 60 млн сум чикләү саклана, ләкин әгәр аларның керемнәре 20-60 млн диапазонында булса, киләсе елда бу махсус режимга хокук югалачак.
2025 елда керемнәре 20 млн сумнан артып киткән эшмәкәрләргә 1 гыйнварга кадәр башка салым системасын сайларга кирәк — мәсәлән, гадиләштерелгән (УСН) яки автоматлаштырылган УСН. Әгәр салым түләүче УСН яки автоУСНга гариза бирмәсә, ул автомат рәвештә гомуми салым режимы түләүчесе дип саналачак. Яңа чикләүгә туры килгән һәм 2026 елның 1 гыйнварыннан ПСНда эшләргә планлаштырганнар салым инспекциясенә гаризаны патентны куллану башланганчы 10 эш көненнән дә соңга калмыйча бирергә тиеш. Моны салым түләүченең шәхси кабинеты аша эшләргә мөмкин, бу шулай ук әзер документны йөкләп алу мөмкинлеге бирә, яки башка уңайлы ысул белән. Патентның якынча бәясен исәпләргә Россия ФНСның онлайн-калькуляторы ярдәм итәчәк.
Шул ук вакытта 20 млн сум лимиты 2026 ел өчен дә актуаль булып кала: аны арттыру ПСН хокукын югалтуга китерәчәк. Лимитны билгели алмаганнар өчен патентны бер елга түгел, ә квартал саен яки ай саен рәсмиләштерү мөмкинлеге бар — ул чакта 20 млн сумны арттыру очрагында ПСН хокукы бары тик соңгы патент бирелгән чор башыннан гына югалтылачак.
Алга таба керемнәр лимитының чиге кими барачак: 2027 елда патент белән эшләү өчен 2026 елда керемнәр 15 млн сумнан артмаска тиеш, ә 2028 ел өчен — 2027 ел нәтиҗәләре буенча 10 млн сумнан. Әгәр эшмәкәр бу чикләрдән чыга һәм УСНга күчү турында салым инспекциясен хәбәр итми икән, ул автомат рәвештә гомуми режимга күчәчәк. Бу аның 13% тан 22% ка кадәр прогрессив биш баскычлы шкала буенча НДФЛ һәм 22% (10% — ташламалы категория товарлар өчен) ставкасы буенча НДС түләүне берләштерергә тиешлеген аңлата. Шул ук вакытта түләнәсе НДС суммасын тәэмин итүчеләрдән алынган «керү» салымы белән киметергә мөмкин. Бу салымнар буенча хисаплылык һәм түләүләр квартал саен башкарыла, ә НДФЛ буенча декларация елга бер тапкыр тапшырыла. Тулырак мәгълүматны ФНСның «Тиешле салым режимын сайлау» сервисы ярдәмендә ачыкларга мөмкин.