Әлфия Когогина Татарстанда социаль газлаштыру программасын гамәлгә ашыру буенча киңәшмә үткәрде
РФ Дәүләт Думасы депутаты Әлфия Когогина рәислегендә Татарстан Республикасында дәүләт программаларын гамәлгә ашыру буенча эшче төркемнең чираттагы утырышы узды. Татарстан Республикасы сәнәгать һәм сәүдә министрлыгы, Татарстан Республикасы Хезмәт, халыкны эш белән тәэмин итү һәм социаль яклау министрлыгы, «Газпром трансгаз Казан» ҖЧҖ һәм республиканың кайбер муниципалитетлары җитәкчелеге катнашында киңәшмә көн тәртибендәге төп мәсьәлә социаль газлаштыру программасын гамәлгә ашыру булды.
"Россия Президенты игълан иткән программа башланганнан бирле безнең республика халкы 25 меңнән артык гариза биргән, һәм бүген газ 13,7 мең йорт хуҗалыгы участоклары чикләренә җиткерелгән. Димәк, җылылык һәм уңайлылык китерүче зәңгәр ут бу йортлардагы плитәләр өстендә янып киткән. Әйтергә кирәк, программа зур ихтыяҗ белән файдалана. Татарстан монда да лидер – газлаштыру дәрәҗәсе 99,5 % тан артык тәшкил итә. Ләкин республика үсә, актив индивидуаль төзелеш бара, йортлар саны арта, газ бик кирәк», – дип аңлатма бирде Когогина.
"Быел мөһим карарлар кабул ителде, аларны гамәлгә ашыру өстендә хәзер эшлибез. РФ Президенты йөкләмәсе нигезендә 1 марттан йортларның җир участокларын чикләренә кадәр бушлай газлаштыру мөддәте чикләнмәгән генә түгел, ә мәктәпләргә, балалар бакчаларына, ФАПларга да таратылган. Татарстанда уздырылган инвентаризация нәтиҗәләре буенча догазификация программасына сәламәтлек саклау тармагының 36 объекты һәм 22 белем бирү учреждениесе керде.
Шуны да билгеләп үтәсем килә, узган елдан Татарстанда ташламалы категория гражданнарга участок чикләре эчендә газ үткәрү һәм йорт эчендәге җиһазлар өчен субсидия бирелә. 2022 елда гомуми сумма 77 млн сум тәшкил итә, 1 042 субсидия бирелгән. Быел аның күләме 100 мең сумга җиткерелгән. Моннан тыш, хәзер ташламалы категорияләргә СВО катнашучыларының гаиләләре дә кертелгән», – дип билгеләп үтте депутат.