Минзәләдә язгы ярминкә гөрләде
Шәһәр халкы өчен продукциянең һәм товарларның киң ассортименты тәкъдим ителде. Болар-ит, казылык продукциясе, 1,5 литрлы шешәләрдә сөт, сыр, май, каймак, йомырка, бал, он, ярма һәм районның төрле авылларыннан китерелгән башка фермер продукциясе һәм алар барысы да ваклап сату бәясеннән түбәнрәк бәягә сатылды. Ярминкәдә гадәттәгечә барлык авыл җирлекләре һәм авыл хуҗалыгы берләшмәләре, Фермерлар һәм ярдәмче хуҗалыклар, шәхси эшмәкәрләр катнашты.
Шәһәр халкы зур теләк белән сыер, сарык һәм кош ите сатып алды. Шикәр комына, карабодай ярмасына, "Минзәлә" ПК икмәгенә һәм икмәк-күмәч эшләнмәләренә, эшмәкәрләр алып килгән сөт продукциясенә ихтыяҗ зур булды. Әйтергә кирәк, шикәр сатылган җирдә халык күп иде. Бер тонна шикәр комы алып кайтып, бер сәгатькә 60 сумнан саттык. Ярминкәдә "Футука Кидс" фирмасы төрле өй җиһазларын тәкъдим итте, товарларга бәя ташлама белән иде.
Шулай ук "Заиковский" хуҗалыгы, "Заһиев" КФХсы, Юртаудан Ирек Хамматов алып килгән иткә дә ихтыяҗ зур булды. "Талпанников" КФХ 5 тонна бодай, 5 тонна фураж һәм 250 килограмм борчак алып кайтты. Минзәләдән Илгиз Сәхапов үз хуҗалыгында үстерелгән тере йорт куяннары белән сәүдә иткән. Калтактан Владимир Абдулгареев сыерчык оялары да алып кайткан. Минзәләнең балык участогы бер тоннага якын төрле балык тәкъдим итте, ул, һәрвакыттагыча, бик зур сорау белән файдаланды. Чаллыда яшәүче Дамир Сәхапов үзенә генә балык сатып алып калмыйча, Мөслимнең туганнарына кунакка бара, алар өчен 10 килограммнан артык балык сатып алган. Урыс авыл җирлегеннән "Мөхәммәтҗанов" КФХ тере балык-ак амур, карпа һәм сазан саткан. Минзәләдән Рафаэль Мәснәбиев каен, имән, юкәдән мунча себеркеләре белән сәүдә иткән һәм 30 пар себерке саткан. Җәмәк авылыннан Ринас Вәлиев, Калморзадан Рәфак Габдрахманов карабодай балы белән сәүдә иттеләр. Яңа Маҗыннан Вера Колбина тавык йомыркаларын дистәсен 80әр сумга бик тиз саткан, ул шулай ук дуңгыз салосын да алып килгән.
- Оештыручыларга зур рәхмәт, ассортимент зур, бәяләр уртача, сатучылар ачык йөзле. Мин Ирек Хамматовтан ит алам һәм бу юлы да 15 кг бозау сатып алдым. Безнең өчен-минзәләлеләр, бу чын бәйрәм, - диде пенсионер Фирдәвис Хикмәтуллин.
Иртәндән ярминкәдәге сәүдә рәтләре белән район башлыгы Айдар Салахов һәм район җитәкчелеге танышты, ассортимент, сатучылар, халык фикере белән кызыксынды.
Тик менә шәһәрлеләр ярминкәдә капчыклап сатып алу өчен бәрәңге эзләделәр, әмма ул юк иде. Мин шәһәрлеләрнең бәрәңгегә ихтыяҗ зур булуын күрдем. Ярминкәгә Фәрит Гыйлемов улы белән чыкты, ике капчык бәрәңге сатып алырга теләвен әйтте.
Авыл хуҗалыгы ярминкәсе зур социаль әһәмияткә ия. Март башында продукциянең кайбер төрләренә бәяләр артуга карамастан, биредә бәяләр уртача ваклап сатудагы бәяләрдән түбәнрәк кала.
Ярминкәдә ашлык, суган, башка товарларны күпләп сатып алучыларга Раушан Садыйков бушлай хезмәт күрсәтте: ул аларны өйгә кадәр "Лада Ларгус"машинасында алып кайтты.
http://http://menzela.ru/news/tema-dnya/v-menzelinske-otshumela-vesennyaya-yarmarka