Минзәләлеләргә татар телендә дөрес чыгыш ясау серләрен ачтылар
Казан дәүләт мәдәният институты укытучылары район мәдәният сараенда төрле тармак җитәкчеләре һәм хезмәткәрләре өчен татар телендә "сөйләшү теле һәм сәнгать нигезләре" дигән мастер-класс үткәрделәр.
Чара музыкаль-шигъри композиция белән башланып китте. Соңыннан Казан дәүләт мәдәният институты укытучылары Илсөяр Шиһапова, Азат Зарипов, Раушан Шәрипов, Әлфис Галиуллин татар телендә халык алдында чыгыш ясау сәнгатенә өйрәттеләр, киңәшләр бирделәр, музыкаль номерлар күрсәттеләр. Залда утыручы минзәләлеләр укытучылар күрсәткән күнегүләрне кабатлап, актив катнаштылар.
Илсөяр Шиһапова, педагогика фәннәре кандидаты, Татарстан Республикасының атказанган мәдәният хезмәткәре, Казан дәүләт мәдәният институты доценты, сәхнә теле һәм диктор осталыгы буенча белгеч:
– Татар телен саклау һәм үстерү мәсьәләләре буенча Татарстан Республикасы Президенты каршындагы комиссия рәисе Марат Әхмәтов безнең институтка һәр район үзәгендә булырга, төрле һөнәр ияләре булган җитәкчеләр алдында чыгыш ясарга, мастер-класслар үткәрергә, татар телендә чыгыш ясау осталыгына игътибар итәргә кушты. Ул телнең матур, матур, җәлеп итүчән булуын максат итеп куйды. Бүгенге аралашу бер көн белән генә чикләнмәс, алга таба да дәвам итәр дип ышанабыз. Күп районнарны йөреп чыкты. Минзәлә-36 нчы район.
Ике өлештән торган мастер-классларда чыгыш ясау сәнгате һәм төп җитешсезлекләр, әдәби сөйләшү теле төшенчәсе һәм аның нечкәлекләре аңлатылды. Җитәкчеләр һәм авыл җирлекләре башлыкларына дөрес чыгыш ясау буенча киңәшләр язылган китап тапшырылды.
Роза Салдаева, шәһәр башлыгы урынбасары:
- Институт укытучыларының Татар телендә яхшы чыгыш ясаганы, нәфис сүзе өчен мине мактаулары күңелемә хуш килде. Башка җитәкчеләр дә, бүген алган белем һәм күнекмәләрне кулланып, татар телендә чыгыш ясарлар, тыңлаучылар тарафыннан җылы кабул ителер дип өметләнәм.
.png)
.png)