Мәктәпкә җыенырга ярдәм иттеләр
Акция “Бердәм Россия” партиясенең Минзәлә җирле бүлекчәсе ярдәмендә үтә. Быел районда беренче сыйныфка 384 укучы бара, шуның 86сына портфель тапшырылды. Әлеге зур вакыйга уңаеннан булачак беренче сыйныф укучыларын котларга район башлыгы, “Бердәм Россия” партиясенең Минзәлә җирле бүлекчәсе сәркатибе Айдар Салахов, ТР җир һәм мөлкәт мөнәсәбәтләре министры Азат Хамаев, район советы депутатлары, авыл җирлекләре башлыклары, гомуми белем бирү учреждениеләре директорлары, район предприятиесе һәм учреждениесе җитәкчеләре килде. Балалар һәм кунаклар өчен Балалар иҗат йорты укучылары көче белән концерт, шулай ук мультфильм геройлары белән бәйрәм тамашасы оештырылды.
Александра Андриянова:
– Безнең ике балабыз бар, кечкенәсе – беренче, олысы дүртенче сыйныфка бара. Без акциядә катнашырбыз дип өметләнмәгән идек. Көтмәгәндә безне чакырдылар, шуңа күрә без монда. Безгә канцтовар тутырылган (авырлыгы да бар) портфель тапшырдылар. Бүген ике һәм күбрәк бала булган гаиләләргә бик авырга туры килә. Уку кирәк-яраклары алыр өчен генә биш мең сум акча тоттык, әле тагын шуның өстенә мәктәп, спорт формасы, аяк киеме һәм тагын бик күп башка нәрсәләр кирәк. Мондый хәйриячелек акциясендә булышучыларга сәламәтлек телим.
Наталья Крючкова:
– Мәктәпкә җыену – балалары булган һәр гаилә өчен зур мәшәкать инде ул, ә безнең гаиләдә өч бала. Минем беренче сыйныфка игезәк улларым бара. Олысы җиденче сыйныфка бара. Шуңа күрә безнең гаилә өчен зур чыгым. Без бу акцияне көттек, бик шатландык, район җитәкчелеге игътибарсыз калдырмый, булыша, стабильлеккә өмет бар.
Бүләк ителгән портфельдә кирәкле булган бөтен нәрсә бар
“Мәктәпкә җыенырга ярдәм ит” акциясендә бүләк ителгән портфельләрдә ниләр барлыгы турында бик күпләр кызыксына. Аларның һәркайсында: 10 данә шакмалы дәфтәр, шул кадәр үк буйлы дәфтәр, китаплар өчен тышлык (21*28) - 5 данә, дәфтәрләр өчен тышлык - 10 данә, шариклы ручка - 5 данә, гади карандаш - 5 данә, төсле карандашлар җыелмасы (12 төрле) – 1 кап, рәсем дәфтәре (40 битле) – 1 данә, акварель буяулар җыелмасы (12 төсле) – 1 данә, “гуашь” буявы – 1 данә, линейка, пенал, пластилин, төсле кәгазь, төсле картон, клей, кайчы, очлагыч, су өчен савыт, көндәлек, ранец – 1 данә, бетергеч – 2 данә, пумала – 4 данә бар.
безнең өстәмә
“Мәктәпкә җыенырга ярдәм ит” акциясендә 87 иганәче (аларның исемлеге menzela.ru сайтында бирелде) тарафыннан 207 мең сумлык ярдәм күрсәтелгән.
Газета укучыларыбызга шуны ирештерәсе килә: ВКонтакте – Мензелинск ОНЛАЙН төркеменең “Минзәлә” ММҮгә бернинди катнашы юк.