Сүнмәс дәрт уты кабыздылар

Илшат ВАГЫЙЗОВ

Әлеге концертны кунак артистлар үзләре белән озак еллар дәвамында ике күрше район авыллары арасында мәдәни элемтәләр урнаш­тыру өстендә кулыннан килгәнчә хезмәттәшлек иткән Иркәнәш авыл җирлегенең элеккеге ве­тераннар советы рәисе мәрхүм Ягъфәр Хафи­зов истәлегенә багышладылар.

Алкышларга күмелерлек номерларга бай булды тамаша: сәхнәдән гармун, курай һәм башка милли уен кораллары моңнары яңгыравы, заманында татар эстрадасының иң популяр, “хитовый” булган, хәзерге көндә инде онытылып баручы җырларның башкары­луы, өлкән яшьтәге артистларның тыпырдатып биюләре – болар барысы да иркәнәшлеләрнең күңеленә генә хуш килеп калмады, ә бәлки, авылның да кайчандыр шулай гөрләп, дәртләнеп, уттай янып яшәгән чакларына ка­рата ностальгия хисләре дә уятты. Кайбер тамашачыларның “шулкадәр күңелгә керде, гел утырып еларлык булды безнең кебек кар­таеп баручыларга”, дип әйтүләре бу хакта ачык сөйли.

Концерт ахырында авыл җирлеге башкарма комитеты секретаре Ләйлә Кәбирова “Сүнмәс дәрт” ветераннар клубына Иркәнәш халкы исеменнән Рәхмәт хаты тапшырды, җирлекнең ветераннар советы рәисе Хәмзә Лотфуллин һәм авыл клубы хезмәткәре Вәсилә Мөҗипова артистларга иҗади юлларында уңышлар теләделәр. Ә мулла Рәис Кәбиров шушы кон­церт авыл тамашачысында чын татар милли моңына булган сусауны басты, дип билгеләп үтте.

Соңыннан иганәчеләр Хәмзә Лотфуллин, Ил­дус Сәрвәров, Рәис Кашапов, Хәмзә Файдров һәм Илсөяр Хәйдарова артистларга бәйрәм өстәле әзерләде.