Студент, активист, спортчы һәм гүзәл...

Илсөяр ХӘЕР ТДИНОВА

Күптән түгел ул Казанда үткән яшь парламентарий форумында катнашты. Чара “Волга” яшьләр үзәгендә узды, Татарстанның 43 районыннан активистлар­ны җыйды. Форум кысаларында мастер-класслар, сөйләшүләр үткәрелде, ораторлык осталы­гы дәресләре дә булды. Рәмзия сүзләре буенча, студентлар өчен иң төп вакыйга – ТР Дәүләт Со­веты рәисе Фәрит Мөхәммәтшин белән очрашу була, ул яшьләр иҗтимагый палатасы оешуы ха­кында сөйләгән. Форумда катна­шучылар Фәрит Хәйрулловичка төрле сораулар биргәннәр.

– Форумның төп макса­ты – яшь парламентарийларны берләштерү һәм аларның икъти­сади эшчәнлеген мотивацияләү. Безнең һәрберебез яңа биремнәр алды һәм башка районнар белән тәҗрибә алмашты. Мин күп кенә кызыклы кешеләр белән та­ныштым, хәзер алар белән со­циаль челтәрләрдә аралаша­быз, әңгәмәләр алып барабыз, төрле проблемалар турында сөйләшәбез. Минем уйлавымча, үзеңне төрле өлкәләрдә сынап ка­рарга һәм бернәрсәдән дә курык­маска кирәк. Рәмзия тумышы белән Баш­кортстаннан. Анда аның әбисе белән бабасы яши. Ул аларга ку­накка кайткач, йорт хайваннарын дәвалый. Туган ягында аны җирле ветеринарлар да белә, ул анда практика үткән. Бу гүзәл кызның хайваннарга мәхәббәте бала чак­тан ук ярала, ул кечкенәдән үк хайваннарны дәваларга хыял­ланган. Техникумны тәмамлагач, югары уку йортына керергә, аны тәмамлап, квалификацияле бел­геч булырга, алга таба үзенең шәхси клиникасын булдырырга планлаштыра.

– Мине бу тормышта бар нәрсә кызыксындыра, – ди Рәмзия. Дәрестән тыш дәресләр, чара­лар, өстәмә секцияләр, спорт – боларның барысы да минем яшәешемне тәшкил итә, мин аны якты итәргә тырышам. Уйлавымча, һәр кеше алдында барлык юллар ачык. Һәм аларның иң мөһиме – студент еллары, бу сукмак буйлап ашыкмыйча һәм вакытны кумыйча үтәргә кирәк. Бу кызның девизы – бернәрсә-дән дә курыкмаска һәм бары тик алга барырга. Рәмзиянең күңелсезләнеп утырырга вакыты юк, буш вакытлар­да курсташлары белән бассейнга йөри, волейбол һәм җиңел атлетика белән шөгыльләнергә ярата. Спорт ярышларында даими катнаша.