Аэробика соклану уята
Фәнил ГАРИПОВ
Балаларның чыгышларын сокланып карап утырдым. Ә бит әлеге чыгышларны карарга барганда мин критик уйлар белән барган идем, чөнки аэробика ул бию, ритмика, гимнастика катнашмасы буларак яңарак барлыкка килгән спорт төре. Кызлар искитмәле чыгышлар күрсәтте. Эш энтузиастлары, тренерлар Жанна Фатыхова, Светлана Шарипованың зур көч куйганнары күренеп тора, хәтта 4 ай гына шөгыльләнгән 4-6 яшьлек балаларга карап та күреп була иде моны.
Жанна Фатыхова кул астында өч төркемдә 36 бала шөгыльләнә, шуларның 5 се спорт мастерлыгына кандидат, 11 бала үсмерләрнең 1 разрядына, 3 се зурларның 3 разрядына ия.
Республикакүләм ярышларда да катнашалар, 2015-2016 елларда ике тапкыр Татарстан данын яклап Россия чемпионатында Чебоксарда көч сынаштылар һәм 15 команда арасында 6 нчы урынны яуладылар.
Әлбәттә, проблемалар да юк түгел. Берәр ярышка бара башласаң, транспорт мәсьәләсе килеп туа. Нәфислекне арттыру, хореография хәрәкәтләрен үзләштерү өчен станок ясату, гимнастика киемнәре булдыру өчен ярдәм кирәк
Әлеге чара хакында тулырак фотолар белән menzela.ru сайты аша да танышырга була.