Иркәнәштә күмәкләшергә, ә Әтрәкледә күмәк көч белән җитештерүне арттырырга омтылалар

Иркәнәш җирлегенә караган авылларда  яшәүчеләр данлы үткән елларын сагынып яшәү белән беррәттән үз хуҗалыкларында авыл хуҗалыгы продукциясен җитештерүне арттыра ба­ралар. Биредә сыерлар саны гына түгел сарыклар, кошлар саны да арта бара. Рөстәм Шәрәфетдинов белән Илгизәр Камалов хуҗалыкларында мөгезле эре терлек саны 17 шәр башка җиткән. 5-6 баш сыер тотучылар да бар. Нәтиҗәсе дә матур – сөт сату үткән ел белән чагыш­тырганда 1200 центнерга арткан. Сөтне “Заиков­ский” хуҗалыгына тапшы­ра башлагач, аның бәясе дә декабрьдә 20 сумга күтәрелгән. Әмма залдан ишетелгән репликалар­дан аңлашылганча, күрше хуҗалыкка тапшырудан отуларын аңламаучылар барлыгы калган. Күчеш чоры психологиясе.

Көнләшү булырга тиеш түгелдер. Радик Фәттахов суытып, чистартып тапшыр­ган сөт күләмен арттырып, аңа бәяне күтәрергә ом­тыла. Ул сөтне югарырак бәягә саткан саен, сөт тап­шыручыларга да күбрәк түләү мөмкинлеге арта бит. Әтрәкледә райондагы бар­лык шәхси хуҗалыклардан сөтне җыеп суытып тап­шырырга әзерләр. Бу хакта Әтрәкледә булган җыенда район җитәкчелеге алдында Рөстәм Газизҗанов белдер­де. Сүз уңаенда, Әтрәкледә хуҗалык экономисты Наилә Һадиуллина докладын­да яңгыраган (хуҗалык үткән елны 80 миллион акча эшләп 20 процент рентабельлелеккә ирешкән) саннарны тыңлаганнан соң әлеге ике авылда ха- лык белән очрашуда кат­нашкан район башлыгы Айдар Салахов хуҗалыкта эшлүчеләргә рәхмәтен җиткерде, аларнын хезмәте башкаларга үрнәк булуын әйтте. Хуҗалык җитәкчесе тәвәкәлләп керткән алдын­гы технологияләрнең тагын да нәтиҗәлерәк эшләргә мөмкинлек бирәчәгенә ышанычын белдерде.

Әтрәкледә мари хал­кы яшәгән авылларда социаль-көнкүреш объект­лары төзүгә (Калтак авы­лында быел клуб төзү дә планга кертелгән) игътибар биргәннәре өчен респу­блика, район җитәчелегенә рәхмәт әйтсәләр, Иркәнәштә авылның киләчәге хакында шактый бәхәсләштеләр. Бигрәк тә Илгизәр Камаловның дан­лы колхоз тарихын искә алып янәдән күмәкләшергә чакыруы яңа, хәтта көтелмәгәнрәк фикер бу­лып яңгырады. Колхозны сафка бастырып булмас, билгеле. Бу хакта Айдар Салахов та әйтте. Әмма төзек диярлек торган элек­кеге ферма корпусларының бушлыгына эшчән кешенең борчылуы аңлашыла. Бу хакта Илгизәр Камалов белән аерым әңгәмә оеш­тырырга планлаштыра­быз. Иркәнәш төбәгендә яшәүчеләрне борчыган проблемага газ хезмәте җитәкчесе Владимир Черновның җавабы район­да яшәүчеләрне дә шатлан­дырыр. Алар газ хезмәте өчен түләүдә аванс язу­ны туктатырга җыеналар. Моның өчен саннарны ва­кытында биреп барырга һәм ай саен соңламыйча түләргә генә кирәк.

Авылдан җыелган чүп өчен түләүгә кагылыш­лы мәгълүмат газетаның киләсе санында басылачак. Авыл халкын мәктәпсез калу гына түгел, балалар бакчасы булмау да борчый. Шул ук вакытта күрше авыл­дагы бакчага барлык бала­лар да йөрми. Иркәнәштә балалар бакчасын янәдән торгызу өчен өч миллион сум акча кирәк. Бу фактның нинди зур проблема икәнен аңлату өчен тагын бер сан – мәктәп ябылгач, җирлек бюджеты элек укытучылар түләгән керемгә салымнан да мәхрүм калган. Авыллар­ны төзекләндерүгә тотылу өчен җыелган үзара салым түләмәүчеләр дә бар. Чөнки бу җирлектә 19 кеше эшсез (күрше хуҗалыкта эшче куллар җитешми хәтта) утыра. Тормышларын алып барырга тырышучылар читкә китеп эшли. Шул ук вакытта хуҗалыкларында мал тотып яшәп булуын аңлаучылар да арта бара.

Һәр авылның үз көе. Аның моңлы яисә дәртле ритмнардан торуы шун­да яшәүчеләргә туры­дан-туры бәйле. Әтрәкле һәм Иркәнәш авыл җирлекләрендә үткән җыеннарда булып кайткан­нан соң бу фикер миндә та­гын да ныгыды.