Вәгъдәдә генә калмасын

“Бердәм Россия” партиясенең территориаль бүлекчәсе җитәкчесе Елена Сысоева җитәкчелегендә ТР Дәүләт Советы депутатлары, район һәм шәһәр җитәкчелеге, шулай ук оешма-учреждение вәкилләре катнашында түгәрәк өстәл оештырылды. Район башлыгы Айдар Салаховка һәм ТР Дәүләт Советы депутатларына минзәләлеләр үзләренең гозерләрен җиткерделәр

Ветеранга җылылык кирәк

Район башлыгы Айдар Са­лаховка шәһәрдә яшәүче Михаил Загуменов Садак бистәсендәге Хирург Дружков урамына газ кертү мәсьәләсе белән мөрәҗәгать итте.

А.С.:

– Әлеге урамга газ кертү буенча про­ект ясалган, аны киләсе елга, апрель, май айларында башкару планлаш­тырыла. Бистәдәге яңа урамнарны да күздә тотып, бу мәсьәләдә респу­блика җитәкчелегенә хат юлларга да туры килергә мөмкин.

Зөлфия Шигапованың да гозере шуңа охшаш иде – шәһәрдәге Сугыш­чы Интернационалистлар урамы, 84А адресы буенча әтисе – сугыш ветера­ны Мәлих Талбиев яшәгән йортка газ кертүне, урам баганаларга яктырт­кычлар урнаштыруны сорады.

З.Ш.:

– Ветеран әтиебезгә җылылык бүген кирәк. Йортны кышкы чорда электр белән җылыту бик кыйммәткә төшә. Аңа нинди дә булса ташлама юкмы?

Илгиз Шаймуратов, Энерго- сбытның халыкка хезмәт күрсәтү офисы начальнигы:

– Бу очракта электр энергиясе бу­енча чыгымнарга 30 процент ташла­ма каралган, документларыгызны җыеп безгә гариза язарга кирәк.

Валентина Мозгович, Шамов урамы, 61:

– Урамыбыздагы 59-63 нче йортларның җир участокларын су ба­сып җәфаланабыз.

А.С.:

– Әлеге суның грунт суымы, әллә башка сәбәпләре бармы икәнлеген ачыкларга кирәк. Моның өчен җаваплы службалар вәкилләреннән комиссия төзеп, әлеге проблеманы өйрәнәчәкбез. Хәзергә йорт тирәли дренаж ясап кую мәсьәләсен карарга кирәк.

Шәһәр Советы депутаты Флүн Гараев (Ленин паркындагы чаңгы юлында) чаңгычы балалар белән шөгыльләнүче тренер Владиленин Мильчаковның гозерен җиткерде: чаңгы юлында яктылык көйләү, чаңгычы балалар өчен уңайлы шарт­лар тудыруда ярдәм итүне сорады.

А.С.:

– Элеккеге СПТУ тулай торагы буш тора, перспективада бер өлешен шушы чаңгычылар өчен файдала­нырга мөмкинлек бар.

Айдар Салахов әлеге гражданнарның мөрәҗәгатьләрен игъ­тибар белән тыңлады, тиешле службаларның җитәкчеләренә алар­ны оператив хәл итү чарасын күрергә, контрольдә тотарга кушты.

Депутатка рәхмәт йөзеннән

Гражданнарның гозерен ТР Дәүләт Советы депутаты, «Органик Групп» ҖЧҖ генераль директоры Илдар Гыймадиев та тыңлады.

Рөстәм Әхмәтханов, Наратлы Кичү авылыннан үзешчән компо­зитор:

– Күпсанлы җырлар авторы, әфганчылар турындагы җырларым да шактый. Җырларымны бергә туплап, сыйфатлы диск чыгаруда ярдәм итә алмассызмы? – дип ярдәм сорады.

Гадәттә, депутатлар, җитәкчеләр теге яки бу эшчәнлектә активлык күрсәткән өчен яки ярдәм кулы сузарга теләп, халыкка нинди дә булса бүләк бирә. Ә бу очрашуда, киресенчә, Б алалар иҗат йорты ди­ректоры Ольга Ильина “Мәктәпкә җыенырга ярдәм ит” акциясендә зур ярдәм күрсәткәне өчен Илдар Шами­левичка рәхмәт хаты тапшырды.

О.И.:

– Без үз проектларыбыз белән елның елында конкурсларда кат­нашып, грантлар да отабыз, ләкин төрле эшләнмәләр ясар өчен чимал алуга, җиһазларны яңартуга әлеге акчалар гына җитми, матди яктан ярдәм күрсәтә алмассызмы?

ТР Дәүләт Советы депутаты аларның эшчәнлеге, борчыган мәсьәләләре белән якыннан таны­шачагын әйтте.

Ярдәм кулы суздылар

ТР Дәүләт Советы депутаты Ал­маз Шәриповка бу көнне җиде кеше мөрәҗәгать итте.

Изыскательләр урамы, 2/2 нче йорттагы проблема турында әлеге йорт буенча җаваплы Зоя Корнева:

– Йортыбызның подвалына су җыелып җәфаланабыз, ел саен то­рак инспекциясеннән комиссия ча­кырабыз, кайсы инстанцияләргә генә мөрәҗәгать итеп карамадык, пробле­ма һаман да хәл ителми.

Виталий Цветков, Идарәче ком­пания директоры:

– Шушы йортка охшаш проблема Западная урамы, 30 нчы йортта да бар, биредә язын гидроизоляция ясыйбыз, бу йортка да шул ысулны кулланып карарга кирәк.

Пенсионер Тәнзилә Галиева (Изыскательләр урамы, 1/13, 15 нче фатир) коммуналь хезмәтләр өчен түләүләрнең югары булуына мөнәсәбәтен сөйләде, сугыш чоры балаларына хөкүмәт тарафыннан нинди дә булса ярдәм булырмы дигән гозерен белдерде.

А.Ш.

– Сугыш чоры балалары ту­рындагы мәсьәлә буенча күпләр мөрәҗәгать итә, аларның тылдагы хезмәте бәяләп бетергесез зур. Бу чорга кайсы елларны кертергә дигән сүз бара, бу мәсьәлә чишелеш табар дип уйлыйм.

Мәдәния Миргалимова (К.Маркс урамы, 66, 5 нче фатир) шулай ук коммуналь хезмәтләр өчен счет- квитанциясен күтәреп килгән, йорт яны территориясен берәү дә җыештырмый, без йортыбыз белән ул хезмәттән баш тарттык, ә түләүләргә һаман кертеп куйганнар дип, Идарәче компания белән ике арадагы аңлашылмаучанлык турын­дагы гозерен җиткерде.

Лариса Шәйхетдинова, Тукай урамы, 66, 15 нче фатир:

– Кызыма 14 яшь, бөерләре авырта, даими хастаханәгә Казанга йөрибез. Кызыма магнит-маркер тактасы кирәк иде, ярдәм итә алмассызмы?

Кызының сәламәтлеге турында кайгыртучы анага әлеге җайланма белән шәһәр Советы депутаты, медучилище/техникум директоры Люция Хираҗева ярдәм итәчәген белдерде. ТР Дәүләт Советы депу­таты Алмаз Шәрипов та магнит-мар­кер тактасының тулы комплектын алырсың дип акчалата ярдәм итәргә вәгъдә итте.

Светлана Калинина, район инва­лидлар җәмгыяте рәисе:

– Безнең җәмгыятьтә 67 әгъза бар. Район җитәкчелегенә рәхмәтебез зур – безгә бина бирделәр. Әмма аңа капремонт таләп ителә, төрле түгәрәкләр дә оештыра башладык, мебельләр кирәк иде.

Камил Нәҗмиев, район башлыгы урынбасары:

– Бу проблема безгә таныш, әлеге мәсьәлә буенча “Альпари” хәйрия фонды җитәкчелегенә мөрәҗәгать иттек, мебель белән, аннары кап- ремонт буенча ярдәм булачагына ышанабыз.