Биш проект – җиңүче
“Казанда, “Пирамида” күңел ачу үзәгендә, “РИТЭК” ААҖ һәм “ЛУКОЙЛ” Хәйрия фонды уздырган VI социаль һәм мәдәни проектлар конкурсының җиңүчеләре билгеләнде. Быел конкурска 691 заявка бирелгән иде, грант фонды – 25 млн сум.
Безнең районнан 26 проект тәкъдим ителде, шуларның бишесе җиңүче дип табылды. Халыкка социаль ярдәм күрсәтү үзәге “Урман мәктәбе” проекты белән җиңү яулаган, “Тургай” социаль приюты – “Әкияти урман могҗизалары”, “Умырзая” тернәкләндерү үзәгенең “Спорт дөньясы – һәркем өчен” проекты җиңүче булган.
“Веста” күпфункцияле яшь-ләр үзәгенең “Дустыңа ярдәм кулыңны суз” проекты һәм кадет интернат-мәктәбенең “Мәктәпнең дан музее” проекты да җиңүче дип табылган. Барлык җиңүчеләргә дипломнар тапшырылган.
“Татмедиа” АҖнең “Минзәлә” ММҮ филиалы да мәгълүмати партнер буларак катнаша. Димәк, газета битләрендә, “menzela.ru” сайтында, “Минзәлә дулкыннары” радиосында (107,3 FM ешлыгында) әлеге проектларның ни рәвешле тормышка ашырылуы хакында язмалар басылачак.