Үзе уңган, үзе алдынгы
Римма Санникова “Органик Групп-Минзәлә” идарәче компаниясенең «Минзәлә» хуҗалыгында хезмәт куя.
Уңган савымчы хуҗалык буенча алдынгылар рәтендә, район буенча да сынатмый. Ул бүгенге көндә үз төркемендәге 53 баш сыерның һәркайсыннан уртача 13 килограммнан артык сөт сава. Алдынгы савымчы күптән түгел “Ак барс-Питрәч” агрофирмасы базасында үткән машина белән сыер саву осталарының республика конкурсында катнашты һәм “Җиңүгә омтылыш” номинациясендә җиңеп чыгып, “Браун” утюгы белән бүләкләнде.
Римма кечкенәдән үк әнисе Тәрҗимә ханым янында кайнашып, совхозда сыерлар сава. Иске Маҗында 8 сыйныфны төгәлләгәч, Минзәлә медицина училищесына укырга керә һәм анда бераз укыгач, туган авылын сагынып кайта, фермага сыерлар саварга килә. Менә шуннан бирле 23 ел сизелми дә үтеп киткән. Моннан өч ел элек таналар төркеме җыйды. – Римманың сауган сөте күп булгач, хезмәт хакы да югары,– ди комплекс начальнигы Иван Кожевников. Римма Санникова һәм аның хезмәттәшләренә июнь аенда иң күп хезмәт хакы исәпләнгән. Риммага май, июнь айларына 34-36 мең сум акча хисапланган. Уңган савымчы хезмәттәшләре Ирина Кишева, Галина Хөсникаева, Татьяна Задворнова, Любовь Максименко белән ярышып эшли. Ул гаиләдә дә үрнәк әни, ире Александр белән ике ул үстерәләр. Уллары Алексей һәм Александр Казан социаль гуманитар институтының Минзәлә филиалында икътисад факультетында укыйлар.