Күчмә семинар-уку

ТР Үзәк сайлау комиссиясе Минзәлә районы участок сайлау комиссияләре әгъзалары өчен күчмә семинар уздырды.

Минзәлә муниципаль район башлыгы Айдар Сала­хов һәм Татарстан Республикасы Үзәк сайлау комис­сиясе рәисе Экзам Гобәйдуллин семинарда катна­шучыларны сәламләп, чыгыш ясадылар. Укуларны Татарстан Республикасы Үзәк сайлау комиссиясе рәисе урынбасары Валентина Каменькова, оешты­ру-методик бүлек мөдире Фәридә Таҗиева алып бар­ды. Укыту программасы “Участок сайлау комиссиясе вәкаләтләре. Комиссия әгъзаларының фикер алышу тавышы, күзәтүчеләр һәм массакүләм мәгълүмат ча­ралары вәкилләре хокукы белән хокукый статусы”, “Сайлау участогында хокук бозу очраклары һәм хокук саклау органнары белән бәйләнештә булу” һ.б. шун­дый темалар буенча лекция курсларыннан торды.

Татарстан Үзәк сайлау комиссиясе рәисе Экзам Гобәйдуллин дүрт партиянең Татарстан Президен­тына кандидатлар тәкъдим итүе хакында бәян итте. “Бердәм Россия” праймеризы аша узган республика президенты вазифаларын вакытлыча башкаручы Рөстәм Миңнеханов, аннан башка КПРФ ҮК әгъзасы, рескомның беренче секретаре, ТР Дәүләт Советын­да КПРФ фракциясе җитәкчесе Хафиз Миргалимов, “Гадел Россия” партиясенең региональ бүлекчәсе рәисе Рушания Бильгильдеева һәм ТР Дәүләт Со­веты депутаты, ЛДПРның территориаль бүлеге коор­динаторы урынбасары Руслан Юсупов документлар тапшырды. 29 июльдә Рөстәм Миңнеханов канди­дат буларак теркәлде инде. Экзам Самат улы шулай ук сайлау кампаниясенең рәсми стартына бер айга якын вакыт калуын искәртте. Шушы этапта сайлау участокларының чикләрен билгеләп, яңа йортлар, урамнарның булу-булмавы, сайлау участогында сай­лаучылар санының кануннар нигезендә булуын ачы­клау зарур. Шулай ук территориаль сайлау комисси­ясе һәм участок комиссиясе әгъзаларының кадрлар составын ачыклау мөһим, ир һәм хатын булган кан­дидатларны һәм аларның якын туганнарын, шулай ук кандидатларның турыдан-туры карамагында булган шундый затларны комиссия сос-тавыннан чыгарырга кирәк.

Лекцияләр белән чыгыш ясаган Үзәк сайлау ко­миссиясе рәисе урынбасары Валентина Камень­кова һәм оештыру-методик бүлек мөдире Фәридә Таҗиева сайлауларны оештыру, документларны ту­тыру, сайлау участокларын кирәкле җиһазлар белән тәэмин итү, агитация эшен алып бару механизмын аңлаттылар, шулай ук сайлауларда канун бозу очрак- лары булганда, нинди чаралар күрергә кирәклеген бәян иттеләр.

Исегезгә төшерәбез, быел, 13 сентябрьдә, Татар­станда республика Президентын сайлау һәм җирле үзидарә депутатларын муниципаль сайлаулар узачак.

безнең өстәмә

Соңгы мәгълүмат буенча, Минзәлә муници­паль районының вәкиллекле органнарына 164 депутатлыкка кандидат гариза тапшыр­ган. Шулардан 4 кандидат теркәлү узган (бер­се – Минзәлә шәһәр Советына, калганнары - Тауасты Байлар авыл җирлеге Советына).

Әлфинә ВОРОБЬЕВА