Өйдән чыкмый да түләп булла

Дәүләт хезмәтләре порталы елдан-ел камилләшә бара. Әлеге порталда 200дән артык электрон хезмәт һәм сервис күрсәтелә. Интернетка тоташкан һәр электрон чара аша бу порталга кереп, күптөрле мәгълүмат белергә һәм шул ук вакытта түләүләр дә башкарырга була.

Порталның яртыеллык эш- чәнлегенә ясалган анализдан күренгәнчә, якынча 25 млн хезмәт электрон рәвештә баш­карылган. Бүгенге көндә пор­талда 1,3 млн “шәхси кабинет” теркәлгән, узган елның шул чоры белән чагыштырганда бу 33%ка югарырак. Портал­га керүчеләр дә бермә-бер арткан. Халык әлеге порталга нәрсәдер карарга гына түгел, ә төрле гамәлләр башкару максатыннан керә. Халык еш керә торган популяр хезмәтләр рәтендә ЗАГС бүлегенә гари­за язу, штрафларны түләү һәм балалар бакчасына электрон рәвештә чиратка басу тора. Агымдагы елда портал аркы­лы түләүләр башкару саны да арткан, моңа әлбәттә “АК БАРС” банк карточкасы аша түләү операциясе башкарган­да комиссия алынмау сәбәпче булып тора. Татарстанлылар ярты ел эчендә 3,6 млн. тап­кыр төрле учреждениеләргә электрон чиратка язылганнар, алдагы еллар белән чагыш­тырганда бу 160%ка күбрәк. Чиратка язылучыларның шу­лай күп булуында “Табибка чи­ратка язылу” хезмәте өстәлү дә зур роль уйнаган, күрәсең. Минзәләлеләр дә өйдән чык­мый гына алда санап кителгән һәм башка төр хезмәтләрдән файдалана алалар.

Әлеге версия инде биш ел дәвамында гамәлдә, ә көз ай­ларында дәүләт хезмәтләре яңа сайт та халыкка барып ирешәчәк.

Альбина Бәдретдинова:

– Дәүләт хезмәтләре порталы бүгенге көндә бик актуаль, за­манча технологияләргә корыл­ган зур бер система дип әйтер идем мин. Без, гимназиядә эшләүче укытучылар, хезмәт- кәрләр әлеге порталдан бик теләп файдаланабыз. Сый­ныф сәгатьләрендә укучылар­га да әлеге портал хакында мәгълүмат бирәбез, шәхси кабинетны ничек булдырырга теге яки бу мәгълүматны белү өчен кайда керергә – бары­сын да аңлатырга, күрсәтергә тырышабыз. Соңыннан исә өйрәнгәннәрне ата-аналары­на да җиткерергә дигән өй эше бирәбез.

Алмаз Шәкүров:

– Уңайлы портал. “Шәхси кабинет”ыңны булдырып куй- саң, бөтен кирәкле мәгълү- матны шуннан гына карар­га була. Балалар бакчасына йөрүче балам өчен түләү кви­танциясен кулга тоттырган­ны көтмим, әлеге портал аша суммасын карыйм да – түлим. Шәхси машинамда ерак юл­дан йөреп кайтам икән, фикса­торга эләккән штрафларның булу-булмавын да шуннан ка­рыйм. Ә түләүләрне башкаруга килгәндә, он-лайн банклардан түләүне кулайрак саныйм.

безнең өстәмә

Бердәм хисаплау үзәгеннән (ЕРЦ) алынган мәгълүматлар буенча, Минзәләдә коммуналь хезмәтләр өчен түләүләрнең 25-26%ы электрон рәвештә башкарыла. Шуның якынча 22%ы – он-лайн банкларга, калган өлеше – 3,5-4%ы дәүләт хезмәтләре порталына туры килә.

“Татэнергосбыт” ның матбугат белән эшләү үзәге биргән мәгълүматлар буенча, дәүләт хезмәтләре порталы аша гыйн­вар аенда 46 минзәләле электр энергиясе өчен түләгән булса, июнь аенда исә әлеге портал аркылы 107 кеше түләү уздырган.

“Коммунальные сети” ААҖ дан алган мәгълүматларга ка­раганда, төрле мәгълүматлар алу, квитанция формалаштыру өчен порталга якынча ай саен 60 кеше керә, шуның яртысы су һәм канализация өчен электрон түләү башкара.

Дифиза НУРИЕВА