Укытучыларның ышанычын акладым,
Айгөл – районда рус теленнән БДИны 100 баллга тапшырган бердәнбер укучы. Әйтергә кирәк, былтыр районда андый укучылар булмады. Айгөл алтын медаль алды.
Әңгәмә вакытында без аңардан БДИны бирүнең нечкәлекләре һәм киләчәккә планнары белән кызыксындык.
– Айгөл, 100 балл көтелгән нәтиҗә идеме?
– Шундый ярдәм белән, шундый укытучылар белән мин түбән балл ала алмый идем. Бу минем өчен көтелгән нәтиҗә иде.
– Имтиханнан чыгуга, беренче уйларың нинди булды?
– Кая минем укытучым? Аның белән бергә сөйләшәсем һәм бөтенесен уртаклашасым килде. Рус теле укытучысы Вера Ильинична (рус теле һәм әдәбияты укытучысы Вера Троицкая. Авт.) мине тынычландырды, барысы да әйбәт була диде.
– БДИдан иң югары балл икәнен белгәч, нинди хисләр кичердең?
– Әлбәттә, бу бик дулкынландыргыч мизгел булды. Нәтиҗәне бөтен гаилә белән көттек.
БДИ нәтиҗәсен белгәч, укытучыларымның, әти- әниемнең ышанычларын акладым дип бик сөендем.
– Имтиханнарга кайчан әзерләнә башладың?
– Бу елның гыйнварыннан, Яңа елны каршылаганнан соң ныклап әзерләнә башладым. Без репетиторлар ялламадык, дәрестә һәм өстәмә дәресләрдә алган белемнәребез имтиханнар бирү өчен җитәрлек булды.
– Сайлап алына торган нинди фәннәрдән имтихан бирдең, нәти- җәләре нинди?
– Химия һәм биология. Биологиядән – 87 балл, химиядән 97 балл җыйдым бер хата җибәргәнмен, институтка керер өчен җитәр дип уйлыйм.
– Синең фикереңчә, 100 балл белем күрсәткечеме, әллә уңыш елмаюмы?
– Әлбәттә, уңыш елмаю да булсын, ләкин ныклап укырга кирәк. Без имтиханнарга әзерләнгәндә укытучыбыз Вера Ильиничнаның өенә бардык, хәтта ял көннәрендә һәм каникул көннәрендә шөгыльләндек. Ул безне, үзенең укучыларын, көчен, вакытын кызганмады.
– Кайсы уку йортына керергә телисең, кем буласың килә?
– Мин Казан медицина университетына укырга керәм, табиб буласым килә. Хәрби табиб буласым килгән идем, ләкин кызганычка каршы, соңга калганмын. Гаризамны алдан җибәрергә һәм аерым медицина тикшерүе үтәргә кирәк булган. Әлегә нинди табиб булырга сайламадым, бәлки гомуми практика табибы булырмын, ә аннан соң инде хәрби табиб булырмын. Минем сайлаган һөнәремне әти-әниләрем дә хуплый.
– Синең хыялың нинди?
– Әти-әниемнең, укыту- чыларымның өметләрен акларга, алар безгә ышана. Яхшы белгеч булырга, илебезнең киләчәге бездән тора, шуңа күрә без яхшы укырга тиеш. Әгәр нәрсә дә булса килеп чыкмаса, хафаланырга кирәкми, ә үзеңне кулга алып, максатыңа ирешү өчен алга барырга кирәк.
Илсөяр ХӘЕРТДИНОВА