Төн буе печән хәзерлиләр

“Органик Групп Чулман” идарәче компаниясендә терлек азыгы хәзерләү буенча ике отряд оештырылган.

Механизаторларның хезмәтенә түләү мәсьәләсе белән дә кызыксындык. Әйтик, пресс- подборщик белән эшләүчеләргә 1 тонна печәнгә 24 сум 71 тиеннән түләү каралган. Моннан тыш класслылык өчен 20 процент, техниканың эксплуатацияләнүенә 15 процент өстәмә түләнә, печән җыюда эшләүчеләргә ул бер гектарга – 17 сум 48 тиен исәбеннән.

– Эшләрне болай оеш­тыру отышлы: беренчедән, эш барышына контроль­лек итү уңайлы, икенчедән, җитештерүчәнлек югары. Печән өчен 2914 гектар люцерна, кындырак кебек күпьеллык үләннәр, моннан тыш 1 мең гектар берьеллык үләннәр бар, – ди компания директоры Линар Ахунов.

4200 баш мөгезле эре тер­лек, шул исәптән 1720 баш сыерлар асрала торган ком­пания эшчәннәренә печән хәзерләү заданиесе шактый саллы, 4800 тонна. 5 көн элек күпьеллык үлән чабу төгәлләнгән.

– Ике атна эчендә 3100 тонна печән әзерләнде, шуның 2800 тонна­сы ферма буйларына кайтарып өеп куелды. Һәркөнне 900га якын рулон печән хәзерләнә. Иртәнге 3тән башлап ту­гызга кадәр эшлибез дә, аннары кайтып ял иткәч, көндезге өчтән тугызга кадәр печән әзерлибез. Кипкән печән сыйфатын югалтмау максатыннан эшне шулай оештыр­дык, – диде “Органик Групп Чулман” идарәче компаниясенең произ­водство буенча директор урынбасары Анил Гая­зов.

Хәзерге вакытта мехотрядның берсе “Куй­бышев” бүлекчәсенең Балтай комплексына якын люцерна басуын­да печән әйләндерү һәм җыюда 7 берәмлек тех­ника туп-ланган, моннан тыш печән рулоннарын төяүдә һәм ташуда кат­нашучы техникалар. “Минзәлә” газетасы жур­налистларын механиза­торлар яхшы кәеф, уен- көлке белән каршы алды. Аларның тракторлар янәшәсенә тезелешеп, тамак ялгап алырга тук­талган вакытлары иде.

Аларны тегеләй эшлә, болай ит дип өйрәтү кирәкми дә, үзләренә йөкләнгән эшнең мөһим- леген, печән хәзерләүне кыска вакыт аралы­гында төгәлләү буры­чын кат-кат аңлату да таләп ителми – әлеге җаваплылык каннары­на сеңгән. Чөнки тырыш хезмәтләре белән ыша­ныч яулаган, зур тәҗрибә туплаган механизатор­лар тупланган мехотряд­ка.

Анил Гаязов печән өстендә Әскать Ахметов, Николай Яковлев, Фәнил Сахапов, Наил Галимов, Илгиз Шияпов, Гапте­нур Ямалетдинов, Ленар Вәлиев, Нияз Нуретди­нов, Фәнис Бәдертдинов, Юрий Садретдинов, Ясир Шакиров, Илья Шакиров, Фәнис Хари­сов, Раиф Нуриахметов, Нәсим Сабиров, Ра­мил Нәбиуллин, Өлфәт Фәрдиев, Нияз Лотфул­лин, Мөнзил Гыйльметди­нов, Гомәр Хизбуллин ке­бек авыл эшчәннәренең зур тырышлык куюларын билгеләп үтте.