Очрашулар тагын насыйп булсын

Табигатьнең иң матур, гүзәл мизгелендә без, Минзәлә педагогия училищесын 1965 елда тәмамлаган сыйныфташлар, 50 еллык очрашуга җыелдык.

Минзәлә шәһәренең нәкъ үзәгендә урнашкан, мәгърур ба­сып торучы училищеның ишек төбендә гаять зур җанлылык: озак еллар дәвамында бер- берсен күрмәгән сыйныфташ­лар кочаклашалар, елмая­лар, берара елап та алалар. Тукай, Сарман, Зәй, Акта­ныш, Баулы, Әгерҗе, Ульян өлкәсеннән, Ижау шәһәреннән килгән сыйныфташлар бер зур төркемгә әверелделәр. Барысы 34 кеше җыйналдык Гаҗәпләнүләребезнең чиге юк – бу бит ярты гасырдан соң оч­рашу, күпләребез гомер көзенә – 70 яшькә җитеп килгәндә...

Училищеның таныш баскычлары буйлап соңгы курста белем өстәгән биология кабинетына кереп урнаш­тык. Күрешүдән алган хис- тойгыларыбыз бераз басы­ла төшкәч, сыйныфташыбыз Фирдәвес Хәмитов (ул ук кичәне оештыручы һәм аның спонсоры да) очрашу кичәсен ачып җибәрде. Һәркайсыбызга исәнлек-саулык теләгәч, ба­кыйлыкка күчкән сыйныф- ташларыбызның да исемнәрен атады, аларны бер минут тын­лык белән искә алдык. Чал­лы шәһәренең бер мәчетендә абыстай булып йөрүче хаҗия Әлфия Гәрәева мәрхүмнәр ру­хына Коръән укыды.

Соңыннан актлар залына кер­дек, Муса Җәлил музеен кара­дык. Кафеда төшке ашны аша­гач, Минзәлә урамнары буйлап сәяхәт иттек. Хәзерге көндә исән-сау яшәп ятучы, инде шактый өлкән яшьтә булган укытучыларыбыз В.Марченко, Х . Ә х м ә т в ә л и е в а л а р н ы ң , хастаханәдә дәваланып яту­чы сыйныфташыбыз Вәсилә Баһаветдинова янында булып, аларның хәлләрен белешеп, бүләкләрен тапшырдык.

Иң истә калганы, мөгаен Фирдәвес Хәмитов җитәкләгән социаль һәм гуманитар белем бирү институтындагы чара бул­гандыр. Очрашуның бу өлеше дәресләр формасында узды. Дәресенә карап, сыйныфташ­лар үзләренең кайда, ничек гомер итүләре, эшләре, гаилә хәлләре хакында иптәшләренә мәгълүмат бирделәр. Тәнәфестә исә музыкаль паузалар бул­ды.

Ярты гасырлык хезмәт юлын һәркем намуслы узган. Аны күпләребез училищеда алган һөнәребезгә тугрылыклы бу­лып мәктәптә белем бирүгә ба­гышлаган.

Кичә ахырында бу очрашу­ны алып барган Альмира Гай­нетдинова сыйныфташларга истәлекле бүләкләр өләште. Сабакташлар да, үз чиратын­да, кичәне оештыручыларга – Фирдәвес Хәмитовка, Вәсимә Галләмовага һәм көндәлек эш-мәшәкатьләреннән арынып төрле яклардан җыелган сый­ныфташларга рәхмәт сүзләрен җиткерде.

Вәсилә ХАННАНОВА, Татарстанның атказанган укы­тучысы