Рәхмәт әйтеп халык кул чапты

 Тулбай авылындагы Сабантуе гөрләп узды. Әлеге бәйрәм искиткеч күңел күтәренкелеге белән, бик киң масштабта үтте.

Сабантуйны оештыручы Илгиз Загиев ачып җибәрде, авыл хезмәтчәннәрен якты хезмәт бәйрәме белән ихлас котлады. Чыгышында ул Са­бантуйны оештыруда ярдәм күрсәткәннәре өчен Тулбай авылы кешеләренә рәхмәтен җиткерде.

Гадәттә, Сабантуй татарча көрәш бәйгесе белән башланып китә, шуның белән тәмамлана. Монда көрәшне 3-4 яшьлек малайлар башлап җибәрде. Кайсыберләре сөлге тота белмәсә дә, көрәшергә һәм җиңәргә дип, мәйдан уртасы­на кереп басты. 3-4 яшьлекләр арасында Тауасты Байлар авы­лыннан Мәлик Нәҗмиев җиңү яулады

 Мәйдан уртасында чүлмәк вату, капчык киеп йөгерү, гер күтәрү, балалар, хатын-кыз­лар, ир-атлар йөгереше, арм­рестлинг, таяк тартышу кебек барлык төр ярышлар да оеш­тырылган иде. Бу авылга гына хас булган чыбыркы шартлату, покрышка ыргыту, тазга гармун белән утырган кешене тартып йөрү кебек ярышларны халык бик яратып карады. Чыбыркы шартлатуда шушы авылдан Нәкыя апа Нуриевага, Марат Маликовка тиңнәр булмады. Соңыннан Нәкыя апа хәләле Рашат белән моңлы итеп гар­мунда «сыздырдылар».

Чаллының “Гармония” халык медицинасы үзәге җитәкчесе Гөлфая ханым авылдашларына Сабантуйны оештыруда ярдәм күрсәткәннәре өчен Светла­на Сабирова, Илгиз Загиев, Гөлсинә, Фәния ханымнарга үзенең клиникасында дәвалану өчен кыйммәтле сертификат­лар тапшырды. Авыл җирлеге башлыгы Фазыл Мәүлин шушы авылда туып үскән, кавышып бергә яшәүләренә 50 ел тул­ган юбилярлар – Нәкыя ханым һәм Рашат Нуриевларга махсус бүләк бирде. Әйе, бу парлар сок- ланырлык та: 5 бала тәрбияләп үстергәннәр, авыл җирлегендә һәм район күләмендә үткән һәр чарада актив катнашалар, икесе дә гармунда уйныйлар. Аннары Сабантуйда мыеклы ир-атлар ярышы булды, хатын- кызлар арасында нечкә бил­ле һәм иң юан биллеләрне дә билгеләп үттеләр. Мыеклы ир- атлар ярышында район башлы­гы урынбасары Фәиз Вагыйзов, иң юан биллеләр арасында Тәскыя Вагыйзова җиңеп чык­тылар. Ат чабышын барысы да кызыксынып күзәтте, ә келәмдә милли көрәш батырлары көч сынашты. Атлар дүрт километр- лы дистанциядә ярыштылар. Ат чабышында Малтабар авы­лыннан “Малыш” кушаматлы ат белән Илнур Габдрахманов бе­ренче килде. Икенче урында Күзкәй авылыннан “Ромашка” куша­матлы ат белән Илһам Нуруллин, өченче урынны шу­лай ук Малтабар авылыннан “Башкорт” кушаматлы ат белән Фирзәр Хаматов яулады. Ә Тулбай авылыннан Марат Маликов дүртенчедә калды.

Татарча көрәш теләсә кайсы Сабантуй тамаша- сының иң төп бәйгесе. Ул үз тирәсенә олыны да, ке­чене дә җыя. Бу төр ярышларны күрми калса, кайсы­бер кешеләр: “Сабантуйның ямен күрмәдем”, – дип тә әйтәләр. Батырлар бил алышканда һәркем күзәтте. Көрәш батырларына килгәндә яшүсмерләр арасын­да Хуҗәмәт авылыннан Данил Гәрәевкә тиңнәр бул­мады. Зурлар арасында абсолют батыр булып Чаллы шәһәреннән килгән кунак Илдар Хәмитов калды.

Фирдүс Тямаев җитәкчелендәге артистлар төркеме халыкның күңелен ачты, шаяртты һәм көлдерде, рәхәтләнеп биетте, уйнатты. Сабантуй мәйданын мил­ли моңнарга күмде. Авылдашлары Инзилә Сәлимова да якташларына җыр-моң бүләк итте. Фирдүс үзе дә төрле уеннарда катнашып, халык белән аралашты. Бәйрәмнең мәдәни программасы да тамашачыларның күңеленә хуш килде. Сабантуйны Светлана ханым Сабирова бик матур итеп алып барды. Бер сүз белән әйткәндә, Сабан­туй мәйданы кичкә кадәр гөр килеп торды һәм бу авыл Сабантуе халык күңелендә иң җылы тәэсоратлар гына калдырды. Бәйрәмгә бик күп халык җыелган иде, халык­ка конфетлар, сагыз һәм чупа-чупсларны күпме кирәк балаларга өләшкәннәрен үз күзләрем белән күрдем, ба­лалар һәм өлкәннәр моңа бик нык сөенделәр. Ни дисәң дә сабантуй – ул бүләк өләшү бәйрәме. Бу Сабантуйга барлыгы 15 меңнән артык кеше җыелган иде, үземнең күп авылларда Сабантуйларда булганым бар, әмма бу хәтле күп халыкны күргәнем булмады.

Бәйрәмне оештыруда “Загиев” КФХсы җитәкчесе авылдашлары Илгиз Загиев һәм эшмәкәр Фәннүр Гәрәевларның зур хезмәт салуын да билгеләргә кирәк.

Дилфас ГАЛИЕВ