Тәрбия чарасы
Коноваловка авыл җирлегендә үткән юбилей медальләре тапшыру тантанасы менә дигән тәрбия чарасы да булды.
Чөнки ветераннарны хөрмәтләү мәктәп бинасында һәм мәктәп укучылары катнашында, укучылар алдында үтте. Ике дистәгә якын ветеран башта рәхәтләнеп үзләрен хөрмәтләгәнне тыңлады, аннан соң авыл җирлеге һәм мәктәп укытучылар әзерләгән тәмле ризыклар куелган өстәл артында сөйләшеп утырды.
Бу тантананың тагын бер күркәм ягы шунда – ике милләт халкы дус аралашып яшәгәнлеге бөркелеп торды. Залда утырган бар халык Тупачта яшәүче Фәүзия Хуҗина язган “Картлык” бәетен тын да алмыйча тыңлады, аннан соң Фаина Белова башкаруындагы җан өзгеч “Алексей, Алешенька, сынок” җырын күз яшьләрен сөртә-сөртә кушылып җырлады. Кичәдә катнашкан шәһәр башлыгы урынбасары Елена Сысоева үз чыгышын барлык ветераннарны котлауга багышласа, Коноваловка авыл җирлеге башлыгы Сәрия Билалова иң беренче итеп бердәнбер сугыш ветераны Хәсән Нәфыйковны котлады.
Илдус ШАҺИЕВ