Генерал канәгать китте
– Без сезнең алда гомерлеккә бурычлы, - диде Россиянең ДОСААФ рәисе Александр Колмаков аны каршы алуда катнашкан сугыш ветераны Михаил Тихоновка.
Әфган сугышын үткән генерал-полковник әлеге вазыйфага күптән түгел генә билгеләнде. Минзәләгә килү сәбәбе – аэроклубның һәм автомәктәпнең эшчәнлеге белән танышу иде.
Зур һәм вәкаләтле делегацияне – аның составында Татарстан Президенты киңәшчесе Равил Моратов, Идел буе Федераль округының Татарстандагы баш федераль инспекторы Ренат Тимерҗанов, ДОСААФның Татарстандагы идарә рәисе Радий Зарипов һәм башкаларны – район башлыгы Айдар Салахов каршы алды һәм районда хәрби- патриотик эшчәнлекнең торышы белән таныштырды.
Кунакларга аэроклубның укыту-матди базасы, курсантларның парашютта сикерү әзерлеге, “Десантник” лагеры урыны, хәрби-патриотик тәрбияләүдә нинди чаралар кулланылуы, тулаем инфраструктура белән аэроклуб директоры Равил Нуриәхмәтов, хәрби-комиссар Сергей Владимиров, автомәктәптә армиягә машина йөртүчеләр әзерләү буенча Сергей Топоров сөйләде. Генерал үз күзе белән күргәннәрдән һәм сөйләгәннәрдән канәгать калды. Һәр информацияне төрле сораулар биреп анализлады.
сан
Аэроклубта ел саен 20 меңгә якын кеше парашюттан сикерә. Биредәге аерым йортларда, гостиницада берьюлы 110 кеше яши ала хәзер.