Чистарыну икеайлыгы
ТРның Министрлар Кабинеты 1 апрельдән 31 майга кадәр санитар-экологик чистарту буенча ике айлык игълан итте.
Соңгы көннәрдә тирә-юнебездәге кар катламының күзгә күренеп эреп баруына күпләр игътибар иткәндер. Күп урыннар кардан арчылып бетте. Шуның белән бергә җәмәгать биналары янында, бигрәк тә оешма-предприятиеләр, кибетләр яннарында кар астыннан чүп-чар калдыклары баш калкыта башлады.
Шушы көннәрдә райбашкарма комитетының административ комиссиясе шәһәрдәге кибетләрнең үз территорияләрен карап тотуларын – кардан, боздан чистартылуын, чисталыгын тикшерде, кимчелекләре булган кибет хуҗаларына кисәтүләр ясады.
Адмкомиссия сәркатибе Татьяна Докукина әйтүенчә, үз территорияләрен карап тоту, төзекләндерү кагыйдәләрен санламаган, кисәтүләргә колак салмаганнарга рейд нәтиҗәләре буенча штрафлар да салыначак.