Бик күңелле булды
Әтрәкле авылында авыл үзешчәннәре көче белән әзерләнгән бәйрәм концерты бик эчтәлекле һәм күңелле булды.
Тамашачылар сәхнәдә ут өертеп биегән “Очкын” балалар бию коллективы (укытучы Әлфисә Гәрәйханова үзенең бию түгәрәгендә инде берничә ел укучылар белән төрле биюләр әзерли), “Сердәш” вокаль ансамбле, Җиңүнең 70 еллыгына карата нәфис сүз осталары чыгышларын яратып карадылар. Пучы авылыннан килеп эшләүче Илдар Шәмсемөхәммәтов Әтрәкле башлангыч мәктәбе каршында эшләп килүче курайчылар ансамблен җитәкли. Әлеге ансамбль чыгышы авыл халкының күңелен сөендерде.
Җиңүнең 70 еллыгына багышлап, сугыш башлану һәм авылдашларыбызны сугышка озату күренеше сәхнәләштерелде. Олы яшь- тәге тамашачыларыбызның күңелләреннән 70 ел элек булган вакыйгалар үткәндәй булды, күзләре яшьләнде.
Концерт барышында автор-башкаручылар – Кифая апа Рахматуллина һәм Гөлгенә Гильмуллиналарның йөрәкләреннән чыккан матур шигырьләре программаны бик эчтәлекле итте. Фәрсия апа Бәйрәмова, нәкъ артистлар кебек оста итеп, Гөлшат Зәйнәшева шигырен укыды. Безне, авылдашларны сөендереп, мәдәният йортында гармун моңнарына күмүче – Шайхуллин Расих, бәйрәмнең олы бизәге иде. Илүзә СОЛТАНГАЛИЕВА,
китапханәче