Елмаю бүләк итәләр

Җәмгыятьтә теш табибларына ихтирам белән карыйлар. Стоматологлар безне чыдап булмаслык теш авыртуыннан арындыручылар гына түгел, ә Голливуд елмаюы бүләк итүчеләр дә булып торалар.

Шәһәребездә стомато­логик клиникалар күп булу­га карамастан, район үзәк хастаханәсенең стоматоло­гия бүлегенә халык күп йөри. Мин барган көнне дә теш дәвалатырга килүчеләр шак­тый иде. Күпләр теш табибы­на баруны иң соң чиккә кадәр сузып киләләр. Стоматология бүлегенә килүчеләр буенча сүз йөртсәк, монда кешеләр теш авыртуына түзә алмаган­нан гына килгәннәр дип әйтеп булмый. Бер белгеч-табиб айга 200ләп авыруга хезмәт күрсәтә. Минзәлә стомато­логия бүлегендә ике стома­толог-терапевт, балалар сто­матологы, стоматолог-хирург, стоматолог-ортопед, ике теш технигы, биш шәфкать туташы, ике санитарка һәм регистратор хезмәт куя. Аларның исемнәре һәр минзәләлегә яхшы таныш: Зилә Гайнулова, Анатолий Александров, Ольга Карпова, Галия Әхмәдшина, Василий Красильников, Зөлфия Гатия­туллина, Ринат Муксинов, Ла­риса Ильина, Фәридә Варла­мова, Лилия Енькова, Альфира Исламова, Луиза Әхмәтшина, Татьяна Кузьмина, Ландыш Шайфиева һәм Татьяна Попо­ва. Коллектив бердәм һәм дус.

Әлеге зур булмаган коллектив белән стоматология өлкәсендә 20 елдан артык тырыш хезмәт куйган белгеч – Зилә Гай­нулова җитәкчелек итә. Үз пациентларының мәхәббәтен һәм хөрмәтен яулап алган та­бибка авыруларны дәвалау өстенә бүлекчә белән идарә итү вазыйфасы да йөкләнгән. Финанс мәсьәләләрен чишү, хуҗалык эшләре алып бару, по­ликлиниканы медикаментлар һәм җиһазлар белән тәэмин итү – болар барысы да Зилә Зиннуровна җилкәсендә.

Башка районнардагы кебек, Минзәләдә дә бу өлкәдә кад­рлар җитешмәве сизелә. Күп кенә стоматологлар пенсия яшенә якынлашып киләләр, пенсиягә чыкканнары да бар. Күптән түгел яшь белгеч – Ольга Карпова эшли башла­ган. Район администрациясе аны фатир белән тәэмин итеп, кечкенә кызын балалар бак­часына урнаштырырга ярдәм иткән.

Стоматологик бүлектә про­филактик эш алып барыла, хи­рургик һәм терапевтик дәвалау буенча кичектергесез ярдәм күрсәтелә, протез тешләр яса­ла.

Район үзәк хастаханәсенең стоматология бүлеге мөдире Зилә Гайнулова:

– Гадәттә тере чират белән кабул итәргә тырышабыз, чөнки кискен авырту белән мөрәҗәгать итүчеләр күп. Талон система­сын кертергә телибез, табиблар җитмәү сәбәпле бу әле мөмкин түгел. Бердәнбер теләгебез – кешеләр теш табибларына систе­малы рәвештә күренеп торсыннар иде. Ярты елга бер булса да. Бу безнең эшебезне җиңеләйтер, авыруларга да мәшәкать азрак булыр иде. Безнең өчен иң зур байлык – ул бәхетле һәм рәхмәтле пациентлар. Кешеләрнең йөзләрендә елмаю күрү – эшебезнең төп максаты.