Продукциясез акча булмый

Юртау, Коноваловка авыл җирлекләрендә үткәрелгән халык җыенында авыл хуҗалыгы производствосына, аерым алганда, сөт җитештерүгә, хезмәт хакына кагылышлы мәсьәлә төп урынны алып торуы юкка түгел. “Сөт иле”- “Минзәлә” агрофирмасының хезмәт хакы буенча бурычы өч миллион сумнан артып китә, ә сөт өчен 1 млн 649 мең сум аласылары бар.

Әле Яңа ел алдыннан гына биредәге “Сөт иле “Минзәлә” филиалы директоры булып эшли башлаган Илдус Сауба­нов җыенда ясаган чыгышын­да бөтен проблемаларны ачып салды. Иң беренчесе – яшь терлекләрнең сакланышы. Шуны күздә тотып, терлекче­лек торакларын ремонтлау, төзекләндерү буенча район баш­лыгы Айдар Салахов тәкъдиме белән хуҗалыкларда кертелгән өмәләр шушы җирлектәге Юр­тау сөтчелек фермасында да үткәрелде. Моның яңа туган бозауларның сакланышына, димәк, маллар санын арттыруга этәргеч бирәчәген әйтеп үтте. – Моңа кадәр үгез бозауларны да уңга-сулга тараттык, хәзер алар үзебездә үстереләчәк, дип Ду­сай Кичү авылында ремонтлан­ган тораклар булуы, симертүдәге малларны шунда туплаячаклары турында әйтте.Тагын бер про­блема – хезмәткә түләү буенча җыелган бурыч.

– Декабрьның яртысын кап- лап киләбез. Хезмәт хакы буенча тиешле режимга язгы айларда керербез дип уйлыйм, – диде ул мәсьәләгә ачыклык кертеп.

Көнлек савым түбән. Дөрес, соңгы көннәрдә сизелерлек күтәрелеш бар, ләкин ул бары­бер район күрсәткеченнән ким. Әйтик, Юртау бүлекчәсендә – 9,0, Мәлкәндә 7 килограммнан аз гына күбрәк, фәкать “Якты юл” бүлекчәсендә генә ул рай­он күрсәткеченнән югары. Узган елның шушы чоры белән ча­гыштырганда да көнлек савым кимрәк филиалда. Район башлы­гы Айдар Салахов та бу уңайдан борчылуын белдерде, республи­ка буенча бер сыердан савымның 12 килограммнан артык булуын әйтеп, аларга бурычлар куйды.

Югыйсә, потенциал бар биредә. Авыл җирлеге башлы­гы Ирек Кадыйров әйткәнчә, бистәдә яшьләр күп. Хезмәткә яраклы 220 кеше исәпләнә. Рес- публика программаларының Юртау бистәсендә байтагы ча­гылыш тапкан. Биредә сигез күпфатирлы йорт бар. Узган ел Лесная урамындагы күпфатирлы йортта капремонт төгәлләнгән, гражданнарны авария хәлендәге йортлардан күчерү программасы буенча 10 фатирлы йорт төзелгән (йорт яны территориясендә ба­лалар мәйданчыгы булдырыла­чак, 500 мең сумга уен комплек­сы кайтарылган). Урамнарны яктырту программасы да үтеп кергән бистәгә: 17 яктырткыч лампа урнаштырылган. Ике яшь гаилә узган ел дәүләт програм­масы буенча йорт төзеп кергән, быел шул программа буенча та­гын ике гаилә документлар паке­ты җыя. Соңгы елларда бистәдә тулы бер урам – Яшьләр урамы хасил булуы да бик күңелле ва­кыйга. Шушы урамда юл төзү, коммуникацияләр кертү буенча эшләр башкарылуы да дәүләт, район җитәкчелеге тарафыннан авыл халкына никадәрле игътибар булуын күрсәтеп тора. Авыл­ны үстерүдә производствоның мөһим роль уйнавы билгеләп үтелде. Ләкин авыл хуҗалыгында эшләргә атлыгып торучылар­ны табуы авырлашкан. Фили­ал җитәкчесе Илдус Саубанов Юртауда да, Коноваловка авыл җирлегендә узган җыенда да шушы мәсьәләне күтәреп чыкты. Бүгенге көндә филиалга 17 киң профильле механизатор таләп ителә. Язгы кыр эшләрен баш­карып чыгу җиңел булмаячак, чәчүлек җирләренең көздән 32 проценты гына эшкәртелүе дә үзен сиздерми калмас, диелде җыелышта. – Югыйсә, тырышып эшләгән- дә хезмәт хакы да аз түгел. Яхшы күрсәткечләргә ирешүче терлекчеләрнең айлык хезмәт хакы 20 мең сум тәшкил итә. 30 мең генә түгел, сезон вакытын­да 70шәр мең сум хезмәт хакы алып эшләргә мөмкинчелек бар игенчелектә дә, терлекчелектә дә, – дип сөйләде филиал җитәкчесе.

Коноваловка авыл җирле- геннән әлеге агрофирма бүлекчәләрендә эшләүчеләр күп булмаса да, тырышып хезмәт куючыларның исемнәре атап үтелде. Болар сыер савучыларГалина Бокова, Александр Нико­лаев, Василий Винокуров, трак­торчы Андрей Боков, ветсанитар Мөршидә Камалиева, ветерина­рия табибы Михаил Вышенский, бозау караучы Галина Комен­дант, Мәзлүмә Газизова, эретеп ябыштыручы Виктор Лебедев, җәйгелектә нык булышкан Раиса Хәбирова. Биредә дә эшлим дигән кешегә бөтен шартлар тудыры­луы, әйтик, Юртау бүлекчәсенә көнгә ике тапкыр вахта йөреп то­руы турында әйтелде. Тагын бер яңалык: җәйгелектә Коновалов­кадагы җәйге лагерьга таналар китереләчәк.

Авыл хуҗалыгын үстерүгә ка­гылышлы фикерләрен җиткерү белән беррәттән, авылларны саклауга юнәлдерелгән програм­малар турында сөйләгәндә район башлыгы Айдар Фәслахович авылда эшкә керешкән яшь белгечләргә кызыксындыру чара­лары булуы турында да әйтте:

– Югары уку йортын тәмамлап эшкә керешкән яшь белгечкә дәүләт тарафыннан 100 мең сум, урта махсус уку йортын тәмамлаучыга 50 мең сум, мон­нан тыш бер ел дәвамында ай саен хезмәт хакына өстәмә рәвештә 5әр мең сум бирү ка­ралган. Өстәвенә авылда йорт төзергә уйласа да, моның буен­ча төрле дәүләт программалары бар, – диде ул.

акцент

Район башлыгы Айдар Салаховның авыл эшчәннәре алдына куйган бурычы мон­дый:

– Авыл хуҗалыгы продук­циясе җитештерүне артты­руга ирешергә. Район буенча бүгенге көндә һәр сыердан ур­тача 9,5 литр сөт савып алына, акча булсын өчен производ­ство кирәк, кимендә 14 литр сөт саварга, 700 грамм артым алырга кирәк.

Юртау авыл җирлегеннән Хамматовлар гаиләсе минзә- ләлеләргә яхшы таныш, чөнки әлеге гаилә районда үткәрелүче бер генә ярминкәдә дә катнашмый калмый, үз ихаталарында үстерелгән терлек ите сата.

Ирек үзе күп еллардан бирле “Мензелинскагрохимсервис”ААҖдә механизатор булып эшли, хатыны Нәфисә “Сөт иле-Минзәлә” филиалындагы пекарняда ипи пешерә.

– Хамматовлар гаиләсе үз ихаталарында 7 баш мөгезле эре терлек, 15 баш сарык асрый. Узган елгы ярминкәдә 11 центнер бозау ите саттылар. Уллары Эльвир, Илнар, Илсаф та хезмәт сөючән, кечкенәдән үк эшләп үстеләр, – ди алар хакында Юртау авыл җирлеге башлыгы Ирек Кадыйров.

Табыннар муллыгы өчен үзләреннән шул рәвешле өлеш кертүче әлеге гаиләгә район башлыгы Айдар Салахов Рәхмәт хаты тапшырды, “Мондый тырыш кешеләргә мактау һәм хөрмәт” дип, эшләрендә уңышлар теләде.