Әфганчылар очрашты
Моннан 26 ел элек, 15 февраль көнне, Әфганстан территориясеннән соңгы совет гаскәрләре колоннасы чыкты. Сугышны үз күзләре белән күргән һәм аннан исән-сау кайтканнар бүгенгәчә ул дәһшәтле елларны хәтерлиләр.
Безнең районда бу истәлекле датаны билгеләп үтү гадәткә керде. Иртәнге сәгать сигездә хәрби комиссарият янына 25 минзәләле җыелды. Хәрби комиссар Сергей Владимиров һәм әфган оешмасы рәисе Альберт Миннәхмәтов составындагы делегация сугыш кырыннан кайтмаган һәм бүгенге көндә исән булмаган иптәшләре каберләренә бардылар. Делегация Иркәнәш, Бикбау, Иске Маҗын авылларында һәм Воровский бистәсендә булдылар. Чара вакытында сугышчы-интернационалистлар каберенә чәчәкләр салдылар. Һәрберсен бер минут тынлык белән искә алдылар. Шулай ук бу көнне Тукай районы Иске Абдул авылында урнашкан музейда булдылар. Экспонат буларак, музейга пехотага каршы мина һәм “Алар илгә җиңү алып кайтты” дигән китап тапшырдылар.
безнең белешмә
Әфганстандагы хәрби хәрәкәтләрдә безнең районнан 81 кеше катнашкан, бүгенге көнгә аларның 74е исән. Минзәләлеләр башка кайнар нокталарда да катнаштылар. Чечняда – 182, Тадҗикстанда – 1, Төньяк Осетиядә – 4, Көньяк Осетиядә – 3, Абхазиядә – 9 кеше.
Илсөяр ХӘЕРТДИНОВА