Студентлар хоккей уйный
Авыл хуҗалыгы техникумында физик тәрбия буенча директор урынбасары Рәмзил Бәдриев үзенә тагын бер шөгыль тапты.
Техникумның 15 ләп студенты хоккей уйнарга өйрәнә хәзер. “Юность” боз сарае директоры Хәмзә Гыйлаҗетдиновка бу идея ошаган һәм тыгыз расписаниедә аларга шөгыльләнергә вакыт тапкан. Кыска гына арада техникум командасы урта белем бирүче уку йортлары арасында үткәрелүче спартакиада кысаларында үткән Мамадыштагы турнирда катнашырга өлгерде. Әлегә 6 команда арасында дүртенче. Район данын яклаучы составында, тулы канлы өч бишлек булган мамадышлыларга җитәргә иртәрәк әле. Әмма хоккей уйнарга янып торучы 15 егеттән команда тупларга мөмкин.
Рәмзил Бәдриев:
– Мин билгеле көрәшне ташламаячакмын. Әмма безнең техникум егетләре мини-футболда да, волейболда да активлар. Теннис та үзләштерә башлаячакбыз. Һәр спорт залы спортның бер төре белән шөгыльләнер дип уйлыйм. Студентлар күп бит безнең шәһәрдә.
Айнур Хөсәенов:
– Бездәге артык энергияне спорт аша чыгарып Рәмзил абый бик дөрес эшли. Спорт гөрләп торган уку йортына безнең арттан Мөслимдәге туганнар, башка егетләр, кызлар да тартылыр дип уйлыйм.
акцент
Әйе, спорт тренерлары бу өлкәдә эшне җанландырдылар инде. Әмма яшләрнең мәдәни тормышы бик аксый. Һәр уку йорты үз казанында кайный бугай. Район күләмендә сәхнә яңгыратып, идән бөгелерлек итеп биеп, бәйгеләр оештыру күренми. Ялкаулыкмы, әллә талантлар юкмы? Газетабызның алдагы саннарындагы материалларда без бу сорауга җавап эзләрбез.
Илдус ШАҺИЕВ