ЭШЛӘҮ ӨЧЕН РӨХСӘТ КИРӘКМИ
Агымдагы елның 2 гыйнварыннан көченә кергән документның – Әрмәнстанның Евразия икътисадый союзы турындагы килешүгә кушылуын Минзәлә районында вакытлыча яшәүче һәм эшләүче әрмәннәр дә ( ә алар бездә 72 кеше) бик җылы кабул итте.
Моңа кадәр бу канун Украина, Беларусь, Казахстан илләре гражданнарына гына кагыла иде. Әлеге килешү нигезендә Россиягә эшкә килгән Әрмәнстан Республикасы гражданнары рөхсәт бирүче документлар тапшырудан азат ителәләр. Әлеге гражданнар һәм аларның гаиләләренең Россия территориясендә вакытлыча яшәү вакыты эш бирүче белән төзелгән килешүгә һәм гражданлык-хокукый килешүгә бәйле. Бу килешүләр вакытыннан алда өзелә икән, 90 тәүлек узганнан соң 15 көн эчендә алар яңа килешү төзи алалар. Шулай ук алар Россиягә килгәннән соң 30 тәүлек дәвамында миграция учетына басудан да азат ителәләр.