Артык күбәйгәннәр иде

Төлке үрчегәч, кыр куяны бетте, боҗыр, кыр тавыгы, кыр үрдәге күпкә кимеде, чөнки бу җанвар язын аларның ояларын туздырып, йомыркаларын эчә, балаларын ашый. Шуңа күрә дә төлкеләрнең санын көйләп тору зарур.

 “Кедр” аучылык җәмгыятеннән алынган юл­лама нигезендә без Әтрәкле авыл җирлеге территориясендә төлкеләрне, кыргыйлашкан этләрне юк итүне оештыр­дык. Аучылык күзәтчелеге белән килешендек һәм 20 аучыны җыеп, инструктаж үткәреп, иртәнге сәгать җидедә үк ауны башладык.

Бу урында төлкеләрне күпләп атуның сәбәбен ачыклап үтү кирәктер. Төлкеләр – котыру авыру­ын төп йөртүчеләр. Калтак авылында котырган төлке тотылгач, бу хуҗалыкта махсус карар нигезендә карантин игълан ителгән иде. Безгә ничек тә ха­лыкны, булган терлекне бу афәттән саклап калу мөһим. Төлкеләр шәхси хуҗалыкларга да бик күп зыян сала. Әтрәкле авы­лында халык кош-корт сатып алудан баш тар­та башлаган иде инде. Һәрбер хуҗалыкка ке­реп, төлке 30-40 баш каз- үрдәк, тавык буып чыга иде. Табигатьтә дә төлке – иң зыянлы җанварларның берсе.

Ауны төп оештыручы- ларның берсе – район Советы депутаты, “За­иковский” хуҗалыгы ди­ректоры Радик Фаттахов. Аучылар өчен мул табын әзерләнде, бу үзенә бер төрле спорт бәйрәменә әверелде. Нәтиҗәдә 25 баш төлке атылып, үләт базына озатылды.

Әмма бу эшнең башлан­гычы гына әле. Төлке бит ул бик акыллы, хәйләкәр җанвар. Күпләре җиргә казылган ояларында ка­чып калды.

Рөстәм ГАЗИЗҖАНОВ, Әтрәкле авыл җирлеге башлыгы