Хезмәтебезгә югары бәя

Иң беренче чиратта, тираж, – дип әйтүчеләрне тынычлан­дырабыз. Аллага шөкер, га­зетаны кирәк дип табучылар әлегә җитәрлек.

Былтыргы мөрәҗәгатьтән соң Мензеля.ру сайтында уты­ручы уникальләр, безнең со­циаль төркемдәгеләр саны берничә тапкырга артты.

– Хезмәт хакы, – диючеләргә җавабыбыз түбәндәгечә. Баш­ка филиаллар белән чагыш­тырганда, ким-хур түгелбез. Иҗатта, финанс табуда җигелеп тартучылар әйбәт хезмәт хакы ала. Бездәге профессиональләр белән бертигез дәрәҗәдә эшләргә теләүчеләр генә күренми. Бездә иҗат кешесенә дә, техник як­тан нык “продвинутый”ларга да эш урыны бар. Әмма киеренке эшләргә теләүче яшьләр генә табылмый. Алар хезмәт хакы эшләп тапканның бер өлеше генә булуын аңлап бетермиләр. Мәктәпләрдә, югары уку йорт­ларында үзкыйммәт, табыш, хезмәт җитештерүчәнлеге ту­рында бик өйрәтмиләр бугай. Нинди зур һәм җаваплы мис­сия үтәвебезне искә алган­да, хезмәт хакы уртача район күрсәткечләре белән тигез булса да, күп түгел. Әмма кол­лектив үз хезмәтен җиренә җиткереп башкара.

– Җитәкчелекнең бәя бирүе, – диючеләргә дә җавабыбыз әзер.

2014 ел нәтиҗәләре буенча безнең коллектив газетаның сыйфатын үзгәрткән өчен “Ел лидеры” дигән исемгә лаек булды. “Татмедиа” ААҖнең генераль директо­ры Фәрит Шаһиәхмәтов кул куйган билгене һәркем фи­лиал директорының кабине­тында күрә ала. Әлеге фото­да филиалның алыштыргы­сыз кадрлары булган Рөстәм Хәкимҗанов (фотога төшерде), Дилфас Галиев (отпуск чорында туган авылына кайтып киткән иде), Александра Мельникова (фотога төшәргә бик яратмый), Люция Атналина, Ринат Латый­пов (башкалар фотога төшкән мизгелдә, кибетләргә газета та­раттылар) бар дип күз алдына китерегез.

2015 елда әлеге олы бәяне аклар өчен ныклап тырышасы була. Филиал экономикасының 60 проценты үзебез эшләп тап­кан акчадан тора.

Әлеге материалны газета­га бастырырга әзерләгәндә матбугатка кагылышлы ике зур вакыйга булды. Берен­чесе – Россия матбугат көне билгеләп үтелде. Бу уңайдан Татарстанның Дәүләт Советы Рәисе Фәрит Мөхәммәтшин Казанда Халыклар дуслыгы йортында журналистларны кот­лау чыгышында массакүләм мәгълүмат чаралары вәкил- ләренең тәнкыйте аеруча зур кыйммәткә ия булуын билгеләп үтте. Тәнкыйть сүзләре тор­мыштагы проблемаларны ачы­клау һәм аларны хәл итү юл­ларын эзләү мөмкинлеге бирә, – дигән фикер әйтте.

Икенче вакыйга – Франциядә үз вакытында Мөхәммәд пәйгамбәрне мәсхәрәләгән кари­катуралар бастырган журналның редакция хезмәткәрләрен атып чыгулары. Бу уңайдан төрле фикерләр бар. Террор – кыр­гыйлар эше. Каршы як нинди генә провокациягә барса да (ә Пәйгамбәргә карикатура – про­вокация, журналистлар андый карикатураны башка диннәргә карата да ясаган булганнар), закон нигезендә җавап бирергә кирәктер. Редакция коллективы да террорчылар кулыннан һәлак булган журналистлар, башка кешеләр, туганнарының кайгы­сын уртаклаша. Әмма Украина­да, Сириядә меңләгән тыныч тормышта яшәүче кешеләрнең һәлак булуы хакында Евро­па илләрендә ни өчендер яз­мыйлар. Ниндидер көчләр тәэсирендә булган террорны дингә сылап калдырмакчы була­лар.

Сүз иреге дип тулы бер динне хурлау бернин­ди рамкаларга да сыймый. Җәмгыятьтә, шушы мөхиттә яшәп тә ул җәмгыятьтән, аның традицияләреннән азат булу мөмкин түгел. Глобализа­ция авылларны гына түгел, милләтләрне дә кыса, диннәрдә дә үзгәрешләр бар.

Бу уңайдан Россия Ислам университеты ректоры Рәфыйк Мөхәммәтшинның “Ватаным Та­тарстан” газетасында басылган фикере игътибарга лаек дип са­ныйбыз.

– Европа хәзер күп динле, күп милләтле җәмгыятькә әйләнде. Башта ул христиан цивилизаци­ясе өлеше иде бит. Америкада халыклар, диннәр кушыла ал­ган булса, Европада бу барып чыкмады. Ике цивилизациянең каршылыгы яңа дәвергә керде дип әйтергә була бу очракны. Бик куркыныч тенденция бу. Моның нәрсә белән бетәчәген әйтү бик кыен.

акцент

Финанс стабильлеге генә иҗади яктан тотрыклы эшләргә терәк булачак. Шуңа райондаш­ларга быел тотрыклы хезмәт хакы, тәвәкәлләргә үз эшләрендә яңа үрләр, район экономикасына, бигрәк авыл хуҗалыгына үсеш телибез. Район экономикасы ны­клы, гаилә бюджетлары тотры­клы булганда гына журналист­лар, редакциядә эшләүчеләрнең тормышы стабиль булачак.

Россиядә, Татарстанда милләтләр генә түгел, диннәр дә мең еллар бер мохитта, бер-берсен хөрмәт итеп, ара­лашып яшиләр. Дөньядагы аерым бер көчләргә бу оша­мый. Төрле яклап селкетмәкче, түбәнсетмәкче булалар безне. Бердәм булыйк, бергә булыйк! Газета битләрендәге матери­аллар нәкъ менә шушы девиз астында басылачак. Районның социаль-экономик йөзе, аның кешеләре, гомумән, тормыш ту­рында язганда да без шул прин­циплардан чигенмәбез.

Илдус ШАҺИЕВ