Тарих закончалыгы

 Районыбызда дәүләт программалары буенча социаль әһәмияткә ия булган объектлар төзү, капремонтлау эшләре быел да дәвам итә. Алар арасында хәзерге гимназия бинасын балалар бакчасын урнаштыруга әзерләү, ә гимназияне күчерү өчен элеккеге һөнәр училищесы бинасын капиталь ремонтлау да бар. Җәмгыять спираль рәвештә үсә диләр, туры килә бит. Балалар бакчасы өчен төзелгән гимназиянең бинасы тиздән нәниләр кулына тапшырылачак.

Чаллы трактындагы, 1а адресы буенча урнаша­чак гимназия өчен бинаны капремонтлау Фаил Са­биров җитәкчелегендәге “Сферастрой” ҖЧҖ төзүчеләре җилкәсендә, аны 1 августка тапшыру планлаштырыла. Про­грамма буенча капремонт­ка 49 млн сумга якын акча бүлеп биреләчәк, терри­торияне төзекләндерүне дә шушы подрядчылар башкарачак.

Бүген сферастройлы­лар бинаны “штурмлый­лар”, объектта бүгенге көндә 35 эшче кайнаша. Хәер, биредә демонтаж эшләре узган елның но­ябрь аенда ук башланган иде.

 Һөнәр училищесы бинасын капиталь ремонтлау барышында объектта бүгенге көндә 13 штукатур-маляр эшли. Подряд оешмасының баш инженеры төзелештә эшләүчеләрнең һәркайсы турында да мактап язарлык дип бәяләде аларның хезмәтен. Шулар арасыннан Ирина Ни­кулина аеруча өлгерлеге һәм осталыгы белән аерылып тора.

 Ирина Геннадьевнага авыл хуҗалыгы техникумы тулай торагындагы, картлар йортындагы, мәчеттәге ремонтларда катнашырга туры килгән.

– Башка эшне күз алдына да китерә алмыйм, үз һөнәремне бик яратам. Хезмәттәшләрем Галия, Светлана, Оле­ся белән бер-беребезне аңлап, дустанә эшлибез, – ди Ирина.

Баш инженер Артур Мика­елян безне төзелеш эшләре белән таныштырды.

– Дүрт катлы бина бу. Барлык эшләрнең 15 проценты баш­карылды. Биредә демонтаж һәм кабаттан планлаштыру эшләре төгәлләнде. Штука­турка эшләренең 70 процен­ты башкарылды, осталарның бер өлеше класслардагы һәм коридорларда асылмалы (на­весной) түшәмнәр ясау белән мәшгуль. Беренче каттагы түшәмне бизәкләп эшләрбез дип торабыз, әкренләп ишекләр урнаштыра башлый­быз. Шушы эшләргә парал­лель рәвештә инженерлык челтәрләре яңартыла. Бинаның тәрәзәләрен алыштыру, ты­шын һәм түбәсен яңарту кебек эшләр дә башкарылачак.

акцент

Бер көйгә генә эшләп то­ручы гимназия коллективы өчен башта ремонт, аннан күченү мәшәкатьләр ту­дырыр, билгеле. Былтыр, мәсәлән, Яңа Мәлкән мәктәбе укытучылары төшкә кадәр укыттылар, ә аннан соң җиң сызганып ремонтчыларга бу­лыштылар. Хәзер рәхәтләнеп яңартылган мәктәптә эшлиләр. Әмма дәүләт тарафыннан шундый про­граммалар дәвам иткәндә, нигә мөмкинлектән файда­ланып калмаска соң! Бер яктан, гимназия яңартылган бинага ия була, икенчедән, Изыскательләр бистәсендә өстәмә балалар бакчасы булу комачау итмәячәк, биредә 140 урынлы балалар

Гимназияне күчерү уку фор­масы системасына үзгәрешләр алып киләчәк. Бу хакта район мәгариф бүлеге җитәкчесе Наил Габдуллин болай диде:

Гимназиягә яңа бинада мөмкинлекләр күбрәк булачак, шуңа да биредә укытуның яңа программасын кертергә тели­без. Гимназия көндәшлеккә сәләтле мәгариф учреждение­се булырга тиеш. Бәлки ул гим­назия-лицей рәвешендә булыр. Анда гимназиянең шул ук укы­тучылар составы күчереләчәк, аларның потенциалы бар. Шул ук вакытта аларны эшкә фәкать конкурс нигезендә алырга, райондагы иң яхшы, иң көчле укытучыларны шунда тупларга исәплибез. Укытуның сыйфатын күтәрү өстендә эшләячәкбез. Теләгебез – шәһәрдә элиталы үрнәк мәгариф учреждениесе булдыру.

Гимназияне училище бинасына күчерүгә кагылышлы мәсьәлә турында мон­нан ел ярым элек район җитәкчелеге, укыту­чылар коллективы катнашында үткәрелгән ата-аналар җыелышында сөйләшү булган иде. Моңа ата-аналар арасында каршы килүчеләр булмады, киресенчә, анда да шушы педа­гоглар коллективы кала икән, автобуслар йөреп торса, без каршы түгел дигән фикерләр яңгырады.

Училище бинасы 30 ел хезмәт иткән инде. Нәкъ шуның өчен дә ул республиканың мәгариф учреждениеләрен капремонтлау про­граммасына кертелде. Училище бинасының өстенлекле яклары нинди соң? Хәзерге гимна­зия бинасының гомуми мәйданы 2300 кв.метр булса, училищеныкы – 3600. Заманында ул гомумбелем бирү учреждениесе буларак проектлаштырылган булган. Иркен спортза­лы, ашханәсе, 100 урынга исәпләнгән тулай торагы бар. Тулай торак дигәннән, монысы хәзерге чор өчен бик тә әһәмиятле. Чөнки соңгы 2-3 елда райондагы авыл мәктәпләрен оптимизацияләү нәтиҗәсендә җиде авыл мәктәбе «төп гомуми мәктәп» дигән статусны алды. 9 нчы сыйныфтан соң шушы авыл­лардагы балаларга (бу барлык укучыларның 50 проценттан күбрәге) укуларын тулай то­раклы гимназиядә дәвам итәргә менә дигән мөмкинлекләр дә ачыла дигән сүз.

Флүрә МУСИНА