Юдиннар биләмәсе киңәя

 Воровский исемендәге авыл җирлегендә узган халык җыенында район җитәкчелеге адресына үзләренең гозерләрен белдерүчеләр булмады да диярлек.

Хәер, авыл тормышына кагылышлы сорауларына җавапны алар район баш­лыгы Айдар Салаховның

 чыгышында тапты бул­са кирәк. Өстәвенә авыл җирлеге башлыгы Әлфия Латыйпова да җирлектә башкарылган эшләр, авыл тормышы турында җентекләп сөйләде.

Бу хакта авыл җирле- гендәге өлкән яшьтәгеләр исеменнән чыгыш ясаган пенсионер Георгий Шесте­ров та әйтеп узды. Ә менә шушы авыл җирлегендә үзенең эшчәнлеген алып

 баручы КФХ башлыгы Алексей Юдинга авыл ур­тасындагы буаны төзек- ләндерүгә кагылышлы авылдашлары гозерен җиткерде ул. Моның сәбә- бе Алексей Юдин аягында нык басып торучы фермер хуҗалыгы башлыгы булу өстенә, авылдашларының үтенечен беркайчан да игътибарсыз калдырмау­да да.

 сан

* Воровский исемендәге авыл җирлегендә шәхси хуҗалыклар саны 250, аларда 63 баш мөгезле эре терлек асрала, шуның 45е сыерлар.

* 2013 елда үзмәшгульлек буен­ча эш башлаган 43 эшмәкәрнең 16сы бүгенге көндә дә эшчәнлекләрен дәвам итәләр.

Бу юлы да авыл җыенында катнашкан һәм чыгыш ясаган КФХ башлыгы язга чыккач та бу­ада эшне башлап җибәрәчәген әйтте. Район башлыгы Айдар Салахов та авыл халкының әлеге гозеренә игътибар­сыз калмады: “Бу мәсьәләне контрольдә тотарбыз, таләп ителсә, ярдәм кулы сузарбыз”, диде ул.

Авыл җирлеге башлыгы Әлфия Латыйпова 2013 елда үзмәшгульлек буенча эш башла­ган 43 эшмәкәрнең 16сы бүгенге көндә дә эшчәнлекләрен дәвам итүләрен, өчесенең лизинг- грант отуын билгеләп үтте.

– 250 шәхси хуҗалыкта 63 баш мөгезле эре терлек асра­ла, шуның 45е сыерлар. Узган ел шәхси хуҗалыклардан 68 тонна сөт тапшырылды, – диде ул. Үз ихаталарында сыер то­тучыларга дәүләт тарафыннан субсидияләр бирелеп тә, сы­ерлар санының кимүенә, авыл­да яшәүчеләрнең картаюына борчылуын белдерде. Пенсия яшендә булсалар да, күпләп мал асраучы, хезмәтләре белән дә, тормышлары белән дә үрнәк гаиләләр дә аз түгел җирлектә. Шундый гаиләләргә бүләкләр тапшырылды җыенда.

Алексей Юдин үзенең фермерлык эшчәнлеге бу­енча киләчәккә булган уй- фикерләрен авыл җыенында катнашучылар белән уртаклаш­ты.

Крестьян-фермер хуҗалыгы- ның эшчәнлегендә беренче яңалык – алар шушы җирлектәге КФХ Фаил Зыязовның тер­лекчелек торакларын, Сар­саз Горы авылыннан башлап Мәлкән чикләренә кадәрге 300 гектардан артыграк чәчүлек мәйданнарын үзләренә сатып алганнар. Авыл хуҗалыгы бу­енча бара торган сәясәтне алга сөреп, Алексей Юдин да шушы агымга кушылачагын белдерде.

– Мөгезле эре терлекләр, са­рыклар үрчетмәкче булабыз. Моның өчен тораклар җитәрлек, хәзер читтән һәм райондагы авыллардан маллар җыябыз. Җитештерелгән продукцияне реализацияләү буенча пробле­ма юк – ел әйләнәсе кафебыз эшләп тора. Чәчүлек җирләрен арттырырга уйлыйбыз. 125 гектарда көзге культуралар чәчелде. Бөртеклеләрнең гекта­рыннан уртача уңыш 26 центнер­дан артыграк. Технологияләрне саклаганда югары нәтиҗәләргә ирешергә мөмкин, – диде ул.

Шундый планнары бар Юдинның. Әмма күренеп тора – эшләргә эшчеләр җитенкерәми. Шуңа күрә язын чәчүлек мате­риал әзерләүдән башлап, кырда эшләргә теләк белдерүчеләрне эш белән тәэмин итәчәген әйтеп узды. Хезмәткә акчалата, кирәк икән, ашлык белән түлим, дип тә өстәде.

Аның хуҗалыгында эшләргә теләк белдерүчеләр табылыр, әлбәттә. Чөнки җирлектәге 550 кешенең 129ы пенсионер булса да, хезмәткә яраклыла­ры 325, өстәвенә читтә эшләп йөрүчеләр дә аз түгел, андый­лар 110га якын кеше, диелде җыенда.

Район башлыгы Айдар Са­лахов Алексей һәм аның улы Егор Юдин турында җылы сүзләр әйтте, аларга ышаны­чын белдерде:

– Икесенең дә көч-куәте та­шып тора. Аларның инициати­васы хуплауга лаек. Нинди дә булса дәүләт программасына кертергә кирәк. Бүгенге көндә авыл хуҗалыгында эшләргә теләк белдерүчеләргә дәүләт тарафыннан төрле программа­лар бар. Әйтик, техника алыр­га уйласаң, лизинг-грант бар, гаилә фермалары, эшләрен башлаган фермерларга ярдәм, терлекчелек торакларына юл­лар салу кебек программалар. Шушы юнәлештә эшләгән, тер­лекчелекне үстерергә теләгән КФХларга без бу программалар­га керергә булышабыз.

Флүрә МУСИНА