Җитез куллар кәгазьне дә чәчәк итә

Алёша Еньков сабый чакта кечкенә кулларына кайчы тотарга өйрәнү белән үк ул газета- журналлардан рәсемнәр кисә, ак кәгазьдән көймәләр һәм башлык- панамалар ясарга өйрәнә.

Соңрак исә катлаулы­рак фигураларга күчә. Әнисенә, апаларына төсле кәгазьдән, катыр­гыдан чәчәк бәйләмнәре, вазалар һәм открыткалар ясап бүләк итә.

Мәктәптән тыш ул Ба­лалар иҗат йортындагы “Мастерилка” түгәрәгенә йөри. Анда укытучыла­ры Светлана Лучихина балаларга кәгазь белән эшләүнең һөнәри оста­лыкларын төшендерә. Узган елларда Алё­ша агач белән эшләү, агачны яндырып бизәү түгәрәкләренә йөргән. Әлеге түгәрәкләрдә ал­ган белемнәренә һәм үзе туплаган тәҗрибәгә тая­нып, кәгазьдән күптөрле эшләнмәләр ясый ул. Урамнан гадәти чуер таш алып кереп, үз фан­тазиясен эшкә җигеп, ачык төсләргә буяп бик матур сувенир ясап куйган. Бүлмәсендәге стенка киштәләренә аларның һәрберсен тәртип белән урнаштыр­ган. Алёша җитез бар­маклары белән вак кон­структор детальләрен дә җыярга ярата. Узган ел хастаханәдә яткан­да 1500 детальдән тор­ган конструктордан көн дәвамында бер зур ко­рабль төзеп куеп, таби­бларны да шаккатты­ра. Чыннан да, күпме түземлек, акыл һәм фантазия кирәк аңа. Вак детальдән җыйган ко­рабль, танк, вертолёт, ро­бот модельләре үзләре бер әкияти дөньяга алып кереп китә сине. Һәр хезмәт җимешен саклап кына тота ул.

– Үскәч кем булырга хыялланасың? – дип со­рагач, уйлап та тормыйча:

– Инженер булам, – дип җавап кайтарды.

Быел мәктәптә яшелчәдән ясалган эшләнмәләр конкурсында Алё­ша һәм аның иптәше Илья белән ясалган эшләнмә беренче урынны ала. Алар кабактан арба ясап, аңа ике тычканны җигәләр. Тычканнарны кишердән ясыйлар.

Белгән һөнәрләре дә, тормышка ашасы хыял­лары да күп Алёшаның. Һәр башлангычын әти- әнисе, апалары, укыту­чылары хуплап торганда уңышларга ирешү күпкә җиңел ул.

Светлана Лучихина, Балалар иҗат йорты укытучысы:

– Алёша быел мин җитәкләгән “Мастерил­ка” түгәрәгенә йөри баш­лады. Акыллы, тырыш, зирәк бала. Кушканнарны киреләнмичә, төгәл итеп башкара.

безнең белешмә

Алёша 1 нче урта мәктәпнең 3 нче сыйныфында белем ала. Бик ты­рыш һәм тәртипле бала. Гел “5”легә генә укый. Яраткан фәннәре математика белән рәсем. Спорт белән дә мавыга егетебез: хоккей түгәрәгенә йөри, “Минзәлә лачыннары” команда составында тора, уеннарда катнаша. Ә иң яраткан мавыгуы – балык тоту.

Бала өчен оригами (кәгазьдән фигуралар ясау) бик файдалы шөгыль. Ул фантазияне, фикерләүне һәм иҗади сәләтне үстерә, чөнки фи­гуралар җыю белән беррәттән бала аларны буйый, тагын өстәмә детальләр дә ябыштыра ала. Оригами белән шөгыльләнгәндә ба­лада тырышлык, игътибарлылык, мөстәкыйльлек кебек сыйфат­лар барлыкка килә.

Кыш бабайга да ышана Алёша. Үзе алырга теләгән бүләкне сорап һәр елны хат язып, тәрәзәгә ябыштырып куя. Кыш бабай шуны укый да, Яңа ел төнендә чыршы астына бүләген калдырып китә. Узган ел, мисал өчен, аңа Кеша исемле попугай алып килә Кыш бабай.

Дифиза НУРИЕВА