Иҗади эш илһам бирә

Компьютерлар һәм планшет урынына – игәүләр, пычкы- бораулар, интернет һәм социаль челтәрләр урынына – сызым һәм фотографияләр. Гимназия укучылары тиздән үз куллары белән теләсә нинди көймә ясый алачак.

Мондый кызыклы, әмма бүгенге мәктәп укучылары өчен гади булмаган эшкә ничек җәлеп итәләр? Шуны белү өчен без дә гимназиягә юл алдык.

Мастерскойда җанлылык сизелә, укучылар үзара сөйләшә-киңәшә, кулларында­гы эшләнмәләргә җан өрәләр. Түгәрәккә 15 укучы йөри. Соңгы берничә ай эчендә бу тату команданы укытучы Шәүкәт Солтанов җитәкли, ә аның тәҗрибәсе һәркем кызыгыр­лык.

– Без әле 2,5 ай гына шөгыльләнсәк тә, балалар бик теләп йөриләр. Баш­та теория белән таныштык, корабльләрнең класслары ту­рында гомуми төшенчәләр бул­дырдык, сызымнарны укырга өйрәндек. 5-6 сыйныф укучы­лары резина моторлы броне­катер, “морской охотник” ка­терлары модельләрен ясап та куйдылар.

Индивидуаль эш үз җимеш- ләрен биргән, ә бу балаларда җаваплылык хисен арттыра, алар башкарган эшләре белән горурланалар.

– Мине бирегә укытучым Шәүкәт Рәшитович чакырып алды. Без үз кулларыбыз белән планер, катер модельләре ясыйбыз. Миңа монда бик ошый, – ди Рунар Васильев. Алмаз Сафиуллин исә, “Бу көймәне әти-әниемә күрсәтсәм, алар минем белән һичшиксез горурланачаклар”, – ди. “Буш вакытларны компьютер артын­да уздырганчы, монда йөрүем файдалы да, кызыклы да”, – дип өстәде Рәсүл Акберов.

Соңгы елларда җәмгыяте- бездә техник юнәлештәге белгечләрне әзерләү мәсьәлә- се бик актуаль тора. Шуның өчен белем бирү учреждениеләре моңа йөз белән борылып, яхшы гына нәтиҗәләргә ирешә баш­ладылар.

Гимназия директоры Ренат Ибрагимов:

– Укучыларыбызның бу ма­выгуы беренчедән, үзләре өчен булса, икенчедән, алар төрле конкурсларда катнашып, җиңүләр дә яулар әле, – дип өметләр баглый.

Әлфинә ВОРОБЬЕВА