Яшәү дәрте алып кайттылар
Казан шәһәренең Галиаскәр Камал исемендәге татар дәүләт академия театрында “Әниемә чәчкә бәйләме” дигән зур бәйрәм кичәсендә сугышта катнашкан ветераннарның тол хатыннары, тыл хезмәтчәннәре хөрмәтләнде. Анда безнең районнан 7 тол хатын-кыз катнашты. Аларның бөтенесе дә бу бәйрәмнән бик канәгать булып кайтканнар. Шуларның берничәсе белән без дә аралашып, әлеге бәйрәм турында фикерләрен белдек.
Раиса Дронова:
– Бу бәйрәмнән без бик канәгать булып кайттык. Театрда безнең өчен зур концерт оештырылган иде, аны караганнан соң, ресторанга алып барып сыйладылар.
Мосаллия Вәлиева:
– Әлеге бәйрәм минем өчен әйтеп бетергесез шатлыкка әйләнде. Казанга барыр алдыннан чирләп тора идем, кан басымы да югары иде. Бу бәйрәмдә безне бик хөрмәтләделәр, һәрберебезгә зур чәчәк букетлары тапшырдылар. Бәйрәм академия театрында үтте, анда басып торырга да урын юк иде. Тантаналы чарадан соң ресторанда сый-хөрмәт күрсәттеләр. Казанда оештырылган бу бәйрәмнән хәтта терелеп тә кайттым.
Анна Шмелева:
– 86 яшьтә булуыма карамастан минем бер җиргә дә барган юк иде. Безне әлеге бәйрәмгә алып барган һәм озата барган медицина хезмәткәренә, шоферга, район җитәкчелегенә бик рәхмәтлемен. Әниләр бәйрәме бик яхшы оештырылган, анда сугыш турында сөйләгәндә күздән яшьләр чыкты. Театрдан булган чарадан соң безгә сый-хөрмәтнең иң зуры булды, бүләкләр бирделәр. Бу бәйрәм мин яшәгән вакытта иң истә калганы булды.