ПЕНСИОНЕР ВАФАТ БУЛСА...
Федераль канун нигезендә пенсионер вафат булса, аның пенсиясе ул вафат булган айдан соң киләсе айның 1 нче числосыннан туктатыла.
Агымдагы айда пенсионерга бирелергә тиешле сумма аның вафатына бәйле рәвештә бу айда алынмый калса, мирас составына кертелми һәм гаилә әгъзаларына (ир яки хатын, балалар, ата-аналар, абый-энеләр, апа-сеңелләр, оныклар, әби-бабай), ул вафат булганда аның янында булган затларга түләнә (пенсионер вафат булганнан соң 6 айдан соңармыйча мөрәҗәгать иткәндә).
Бу сумманы алу өчен түбәндәге документлар кирәк: шәхесне раслаучы документ; пенсионерның үлүе турында таныклык; үлгән кешенең туганы булуны раслаучы документ; пенсионер үлгәндә аның белән бергә яшәүне раслаучы документ.
Пенсиянең алынып бетмәгән өлешен сорап башка туганы мөрәҗәгать итсә, аңа пенсионер вафат булганнан соң 6 ай эчендә нотариаль органнарда хокукны раслау өчен белешмә алу өчен яшәү урыны буенча Пенсия фонды идарәсенә һәм нотариуска мөрәҗәгать итәргә кирәк. Бу очракта алынып бетмәгән сумма Пенсия фонды тарафыннан мираска хокук бирүче белешмә нигезендә бирелә.