Иң яхшылары лаек
Сорау тудырган яңалык...
Яхшы укыган, фәнни-практик конференция-ләрдә призлы урыннар алган, предмет олимпиадаларында катнашкан өчен 2014/2015 ел уку елында 2013/2014 уку елы нәтиҗәләре буенча махсус дәүләт стипендияләре билгеләнгән. Казаннан, Әлмәттән, Яр Чаллыдан, Чистайдан, Түбән Камадан, Тәтештән, Лениногорскидан, Сарманнан, Бөгелмәдән барлыгы 90 студент президент стипендиясен алачаклар.
Минзәлә студентлары дәүләт стипендиясен алмый. Сәбәбе нәрсәдә? Бу сорау белән без урта махсус белем бирү учреждение җитәкчеләренә мөрәҗәгать иттек.
Әңгәмәдәш Илсөяр ХӘЕРТДИНОВА
Гөлсинә Рәҗәпова, техникумның тәрбия эшләре буенча директор урынбасары:
– Эш шунда, безгә квота биргәндә, министрлыктан заявка килә. Бу 6 елга бер тапкыр була. 2002 һәм 2008 елларда безнең студентлар президент стипендиясенә лаек булдылар. Алты кеше ярты ел дәвамында айга 1000 сум акча алды. Болар уку алдынгылары, активистлар.
Шулай ук безнең студентлар ел саен транспорт грантында катнашалар. Аны төрле чараларда, ярышларда актив катнашучылар ала. Быел 8 укучы 800 сум күләмендә грант отты.
Миңнегөл Мифтахова, Муса Җәлил исемендәге педагогия көллияте директоры:
– ТР Президенты стипендиясе аз, ә лаеклы укучылар күп. Бу ярдәмне алу өчен уку йортлары чиратта тора. Ике ел элек президент стипендиясенә Россия күләмендә студентлар лигасында катнашкан өчен безнең студентыбыз Лилия Гыйләҗетдинова лаек булган иде. 25 ел дәвамында бу стипендиягә колледжның 10 студенты лаек булды.
Люция Хирәҗева, медицина училище/техникумы директоры:
– Бездә лаеклы студентлар бик күп. Президент стипендиясен алу өчен заявка бирмәдек. Медицина училищесы студентлары махсус дәүләт стипендиясен алырга дәгъва кылганлыгын без белмәдек. Белсәк, әлбәттә, биргән булыр идек. Мин эшләгән дәвердә медучилище студентлары бер тапкыр да президент стипендиясе алмады.