Чакыру билеты – җиңүче кулында
Безнең menzela.ru сайтында уздырылган “Рәхмәт, әни!” конкурсында 22 әни катнашты.
Әлеге конкурста катнашкан һәм финалистлар өчен тавыш биргән һәркемгә рәхмәтебезне җиткерәбез. Конкурсантларның шундый күп булуы куанычлы күренеш. Финалга чыккан 5 әни арасыннан беренче урынга Айсылу Ханова лаек булды. Аның өчен 559 кеше тавыш бирде, бу барлык тавыш бирүчеләрнең 61,9%ы дигән сүз (моңа чаклы без үткәреп килгән конкурслар тарихында тавыш бирүчеләрнең шулай күп булуы әле беренче тапкыр). Икенче урында Айгөл Зайцева, ул 230 тавыш җыйды, бу 25,5%. Ләйсән Жигалова 77 (8,5%), Алия Сайдемова 22 (2,4%), ә Юлия Рылова 15 (1,7%) тавыш җыйган. Барысы 903 кеше тавыш биргән.
Җиңүчебез булган Айсылу Ханованы редакциягә чакырып, аңа зарыгып көткән бүләге – С.Өметбаев исемендәге татар дәүләт драма театрында булачак “Шомбай” спектакленә ике кешелек чакыру кәгазе тапшырылды.
Айсылу Ханова:
–Әлеге конкурста мин уйламаган җирдән катнаштым. Игъланны күрү белән күңелемә ошаган бер фотобызны урнаштырып та куйдым. Ничектер шулай туры килде: без финалга чыктык. Шуннан соң азарт барлыкка килде. Безнең өчен тавыш бирергә дусларны, хезмәттәшләрне үгетли башладык, нәтиҗәсе – җиңү безнең кулда. Безнең өчен тавыш биргән һәр кешегә рәхмәт. Бүләк тә бик гаҗәпләндерде. Гомумән, театрларга йөрергә яратабыз, ә быел сезон ачылуга бара алмаган идек. Мондый көтелмәгән сюрприздан соң конкурсларда ешрак катнашачакмын.
безнең өстәмә
Спектакльгә Айсылу тормыш иптәше Илгиз белән барачак. Алар ике кыз – Алсу белән Адиләне тәрбияләп үстерәләр. Җиңүчебез 2 нче санлы мәктәптә татар теле һәм әдәбияты фәннәрен укыта.